PAULKE ROMKÍDÍLO ATNAM SITHIE 2 - DEENA BAIBÉL (BSI)

Shédíke Bisare

¹ Nolu akon teyolo bisarne, delok legape, nolum mesam peko kamang, kapeila ingkona agomlok nolu akonem bisardudí nolu agísuem ajéng luket sudung, kapeila bisarna no akampe idung.

² Supak ngolu kéndung Shédíke sikepe bisar ina teyolo bisar namde arolok idung.

³ Dekepe iname edílo nolu tanipe idola, buluke teyolo bisardo teríla inam atelem idula, Shédíke bisar lokke dukpísuyé emla nolu míídunía?

⁴ Demangkom Shédíke ayang aapíe nolum míílat sumo dokupe emnamdem kénsumape nolu ayang, hakjém delokke nyogap aapílo miremnem nolu noluke míngki aapílok lengkan dunía?

⁵ Idakkom noluke aapí edalok delokke noluke míílat sukumana aang gekolo, bíkke deena amiem lenmodíku Shédíke mardí longelo, nolu agísue marpenam leríngem mekum sudung.

⁶ Shédí bí “Mipilem agí agí ikorlok biyéku.”

⁷ Aina agérem mínggapla ila angun ralnamem míngge namem delokke nyokyi manamem matana kídíem turyar namem biyé.

⁸ Idakkom séko bulu agí petom legangem matala aruem lupaksula atí manamlok gídudí, bíkke teyolo marlínge pííyé.

⁹ Delo atímape ina tani mipílo yényi yésuelang delokke adírname duuyé: kerape Judai amilo, delokrongem Mipaklo depe iyé.

¹⁰ Idakkom Shédí bí angun ralnam emlang, míngge namemlang delokke yéponamem aina agér inakídí takamlo duudope bito, kerape Judai kídílo, delokrongem Mipak kídílote biyé.

¹¹ Kapeila Shédíke mííbayanam kamang.

¹² Ayon kékonlo paab inakídí takamekom ayon kékonlo nyokyé, delokke ayon gooralo paab inakídí takam emkom ayonlok bisaryéku:

¹³ Kapeila ayon agomem tatna kídí petome Shédíke keralo yéjiinape imang, idakkom ayonem igena kídí petom demin yéjiine empename.

¹⁴ Arope ayon kamana Mipak kídíe ayonlok dorkarnam atíem igíísupe imílo, buluke ayon kamang dagakom, de buluke ayonsupe isuyé.

¹⁵ Buluke inam saanam delokke ayonem buluke ainalo atla metung emnamdem lengkan sudung, kapeila buluke míídue leko leko dekedem aabosudung, lekonem aimanamem luketdung, delo buluke mííyi míísang lokteng lengkandung.

¹⁶ Delokke dekepe ngokke tatpona ngiitomem pobiname idung, edílo Jisu Kristo kelok Shédí bí mesupnam mííyi míísang takamem bisar yékudí delo longedelo de dekepe iyé.

Judaikídí Elang Ayone

¹⁷ Nolu kape? Nolu agísue Judai emsudung; nolu Ayonlo míngke sudung delokke Shédíme yidkím sudung;

¹⁸ Shédí bí ingkuem nolum iyépe míídudí nolu kénsudung; delokke nolu ayonlok ainem malen namem kénkai;

¹⁹ nolu mingmanem gíbone, kaamolo duuna kídíke angune

²⁰ midenem poyilne, delokke kénmana kídíke kaayii sukenge emla berokpe míísudung. Ayonlo noluke kénpenam gyanelang arue apíípe duusudung emla nolu berokpe míísudung.

²¹ Nolu amiem luyilduula, kapeila nolu agísuem luyil sumang kane? Nolu pyoomapeka emla poboduula, nolu agíe pyoomanía?

²² Nolu ami kídíe ami mime milo ukmem mapeka emla pobodula ami mime milo ukmem dunía? Nolu murtiem mepak langka emna kídíe murtiem doppyo dunía?

²³ Nolu Shédíke ayonem bomdung emla yidkímsuna kídíe ayonem betla Shédíme ingil dunía?

²⁴ Dooying kitabe podung, “Judai kídí noluke legalok Mipak kídíe Shédíke amínem lukaadung.”

²⁵ Nolu ayonem míngge ige dumílo dínbíng iyode are kadung, idakkom nolu ayonem betdumílo nolu dínbíng iyod manam akame.

²⁶ Dínbíng iyod manam kídíde ayonke míínampe idumílo bulu dínbíng iyodnam akampe imanía?

²⁷ Amílem iyodmang ilate ayonem igenade, ayon kitabem bomla delokke dínbíng iyod sudola ayonem betna amikídí nolum lukaa yéku.

²⁸ Teyong peelok yénadem Judai ami emmang, delokke teyong peelok amíllo dínbíng iyodsuna demkom emmang.

²⁹ Ayon kitablok yémape, Aidlok aapí ainang aralo dínbíng iyodsuna delokke arang aapílok mííla yéna demmin Judai amie emdune. Sikena tanide koyidem, tani kídí lokmang, idola Shédí kelokmin paadune.