PAULKE ROMKÍDÍLO ATNAM SITHIE 16 - DEENA BAIBÉL (BSI)

Tumbo Salame

¹ Ngoluke bírme, Kenkria Mondoli lokke béérang Phoibe me aipe kaadope nolukíng melíkdung.

² Shédíke amiem torík sunam ayonlok Ruutumke amínlok nolu bím torík suyépe delokke pííram sémuem nolukelok igulem paayépe emla ngo nolum rogudung, kapeila bí ngom lutaksula deddína amiem igulnape ituai.

³ Kristo Jisukíng ngokke yéjon, Priska melang Akuila me salamem bilangka.

⁴ Bulu ngokke legape agí turnamemte améyape míísubomto. Ngo petommang idakkom Mipak kídíke mondoli takame bulum ashépe mínggekai.

⁵ Buluke ekumlo dumsuna mondoli ami kídí emte salamem bilangka. Asialokke kerayalumpe Kristokíng aana, ngokke ayanam angong Ephainet mete salamem bilangka.

⁶ Noluke legape ankípe agér gérna, Marimete salamem bilangka.

⁷ Ngokke erang ngokkíng patek duumínna, Andronik melang Juniame salamem bilangka. Bulu tomlíknam kídí aralokke edííneke delokke ngokke Kristokíng aamang adape bulu Kristokíng duudubong.

⁸ Ngokke Ruutum kelo agér ibosunam, delokke ngokke ayanam angong Ampliatme ngokke salamem bilangka.

⁹ Kristokelo agér ibosunam Urbano, Staku bulum salamem bilangka.

¹⁰ Porikyang ipala Kristokelo tolíknam, Apelle me salamem bilangka. Aristobolas ke ekum erangem salamem bilangka.

¹¹ Ngokke erang, Herodium me salamem bilangka. Ruutum kíng duuna Narkiske ekum erang kídíem salamem bilangka.

¹² Ruutum kíng ankípe agér gérna mimekídí Turphena delokke Truposa bulum salamem bilangka. Ngokke ayanam mime akon Ruutum kíng ankírupe agér gérna Persi me salamem bilangka.

¹³ Ruutum kíng ullennam Roup melang ngokke anepete ina, bíkke anemte salamem bilangka.

¹⁴ Asunkrit, Phlegon, Herme, Patroba, Herma delokke bulukíng duumínna bíro kídíem salamem bilangka.

¹⁵ Philolog, Julia, Neria delokke bíkke bírme, delokke Olumpa delokke bulukíng yémínna Shédíke amikídí takamem salamem bilangka.

¹⁶ Akone akonem deenamlok mumpup bosulangka. Kristoke mondoli takame salamem melíkdung.

Luyin Agome

¹⁷ Bírokídía, ngo nolum podung, apan aran ibola delokke noluke kéntonam luyilem lupatsula noluke bedangem itumbona kídíem ansu langka. Bulu kelokke angu sulangka.

¹⁸ Kapeila dekena ami kídíde ngoluke Ruutum Kristo kepe imape idola buluke agí atek legapemin agér gérdune. Tatpo kaapona agomlok delokke yidnam panamlok bulu kénmana ami kídíke aapíem yadnadung.

¹⁹ Takame noluke dooying ngiitomem tatyindung, dekepe ila ngo noluke teyolo ashénge idung idola nolu takamlo milo arodope delokke atí manamlo midedope emla ngo míídung.

²⁰ Yépomona Shédí bí Soitanem noluke ale rumkílo menape tujémyé. Ngoluke Ruutum Jisuke yanggonge nolukíng duumín daklangka.

²¹ Ngokke agér gérbosunam, Timothi bí bíkke salamem nolukíng melíkdung, dekepe ngokke erang kídí Lukio, Jason delokke Sosipatro bulu salamem melíkdung.

²² Sim sithisim atna, Tertio ngo, nolum Ruutum kelok salamem bidung.

²³ Ngolang delokke sokke mondoli tabunge ashéla duusum sukeng, Gai bí nolum salamem bidung. Taon lokke kumsung ruutum Erasto, delokke ngoluke bíro Kouarto bínyi nolum salamem bidung.

Yidgenam Kumnamlok Luyin Agome

²⁵ Shédíme yidgelaju! Kerango pekai duusuna arang aruem lengkan binamlok delokke ngokke pokannam Jisu Kristoke legang Tatpona Dooyinglok noluke míngkenge edíídope nolum bí iladung.

²⁶ Depe idokom supak kaaluna mirikídíke atnamlok dem arodem lengkantung; delokke duuyarna Shédíke lulíklok takame míngkesula igedope emla dem takam opín kídíem kénmotung.

²⁷ Takamem kényinna, Shédí petomke angun ralname Jisu Kristo kelok agínpe duuyar daklangka. Amen.