PAULKE ROMKÍDÍLO ATNAM SITHIE 14 - DEENA BAIBÉL (BSI)

Noluke Bíruem Bisar Isumapeka

¹ Míngkeng pííramnem torík sulangka, idola bíkke míídusuem akkí lukí sumapeka.

² Ami ayokonem agíke míngkeng emino bím atí takamem domodune, idakkom míngkeng pííramna ami akonde oying ogé petomlok dodung.

³ Takamem dopyamna amide, dopyam manem kangilpe aimang, delokke dopyam mana amide dopyamna amidem lukaape aimang, kapeila Shédí bí bím torík sutubong.

⁴ Akonke béérangem bisarna nolu séko? Bíkke agí ruutum lomin bíkke edíído edíímade duusudune. Delokke bí edííyé, kapeila Ruutum bí bím edíng molane.

⁵ Abíd longem pemílo longe konko akone apekrupe mínggenam longepe míísudung, akone longe takamde akame emla míísudung. Mipile agíke aapí akorlok mííyin supe aido.

⁶ Longe konem apekrupe mínggenade, Ruutumme mínggela dekepe idung. Adín donade, Ruutumme mínggela dodung, kapeila Shédíme yidgela dodung; delokke domape nyona deteng, Ruutumme míngge dola idung delokke bí Ruutumme yidgedola nyodung.

⁷ Legade ngolu sékote agí petom kepe turla duumang delokke ngolu sékote agí petom kepe simang.

⁸ Ngolu turla duudokom, ngolu Ruutum kímin turla duudune; delokke ngolu sidokom, ngolu Ruutum kímin sidune. Dekepe iname, ngolu turdokom. sidokom, ngolu Ruutumke.

⁹ Kapeila sok legang pak pemin Kristo bí sina kelang turnake Ruutumpe idokupe emla sige pala turkakune.

¹⁰ Nolu demílo, agí bíruem kapeila bisar idune, demangkom kapeila agí bíruem kanggíp sudune? Kapeila ngolu takame Shédíke bisarko keralo dagayé.

¹¹ Dooying kitabe podung: “Ngokke duudung tetengem emla Ruutum bí podung, mipile ngokke keralo lebíng koníyé; mipil nappange Shédíkíng lukansuyé.”

¹² Dekemílo, ngolu mipile agíe agíke legangem Shédíkíng pokan subiyé.

Noluke Bíruem Olet Momapeka

¹³ Delok legape, akone akonem bisar inamem mepak bosulaju. Dem megeyéla, noluke bíruem tupsu momadope demangkom paablo olet sumo kumadope aapíem gelangka.

¹⁴ Ruutum Jisukíng duuna akon kepe, takam donam peede deemape imang emla ngo berokpe míídung. Idakkom akone ingkuem deemape míídudí de bíkkepe deemang.

¹⁵ Noluke bírue noluke donam delok duuk dumílo nolu ayanglok agér iyimang. Noluke doko tíngkolok Kristoke sige binam bíruem nyokmo mapeka.

¹⁶ Noluke aipe míínamem atímape luko sumapeka.

¹⁷ Kapeila Shédíke yétade donam tíínam lokmang, idola yéjiinam, dengomnam delokke Deena Aidlo ashéng lokmin idune,

¹⁸ kapeila sikepe Kristome kumnade Shédíme ashémodung delokke taniem tolík modung.

¹⁹ Delok legape dengom bosunam delokke gerep bosunam bedalok gípe emla ralbo sulaju.

²⁰ Donam tíínam legalok Shédíke agérem menyok mapeka. Donam tíínam takamde deene, idakkom akonem tupsu modope dona tíína amide imemne.

²¹ Noluke bírue paablo olík mopena adír demangkom onggur alang demangkom atíkon agérdem imadomílo aiyado.

²² Dekepe iname sim nokke arope míísunam atí kídísim Shédí kelang nokke agíke aralo mesulangka. Agíke aipe míínam agérlok agíem ajéng iket sumana amide gérne.

²³ Idakkom agíke donam atíem mííne míngo sunade gérmane, kapeila bíkke donam tíínamde míngkelok kamang; delokke míngkelok lenmana atí takamde paabe.