PAULKE ROMKÍDÍLO ATNAM SITHIE 13 - DEENA BAIBÉL (BSI)

Among Ruutum Kídíem Ibipename

¹ Mipile yégebona ruutum kídíem rogepe aido, kapeila Shédí bí tolík mape among ruutum kamang, ruutum nana ralnam duuna kídíde Shédíke biname.

² Dekepe iname, séko among ruutum kídíem akdudí de Shédíke ruutum bodope melík namem akne, delokke séko bulu dekepe idudí bulu agí agísulo bisarem laalík sudung.

³ Kapeila ruutum bomna kídíde aina atíem inakídíem irít morít penam kamang idola imemna kídí emmin depe idune. Nolu ruutumpe duuna akonem pesope míímanía? Aina atíem ilangka demílomin bí ngolum koyit yéne.

⁴ Kapeila bí noluke ainam legape agér gérna Shédíke béérange. Idakkom nolu imem dumílo, bím pesolangka, kapeila bíkke yoksadem emmumpe gemang. Bí Shédíke béérange, imemna amiem Shédíke adumpe ingéépene.

⁵ Delok legape, rogebape idumílo ingéé penamem peso kolokmang idola agí aapí míísulok, among ruutum kídíem rogepe aido.

⁶ Sok legapekom nolu kajanang bidung, kapeila among ruutum kídíde, agíem apíípe ruutum agérlo bisuna Shédíke béérang kídíe.

⁷ Noluke ingkona dorgíenge kadudí bulum dortoka, kajanangem bilangka, among kajanang emílo dem depe bilangka; míngge penam emílo, míngge langka.

Mipilke Ibosupename

⁸ Séko kííte edo gemapeka noluke edo gepenam atelde ayang bosunam petomde. Séko akonem ayang bosududí bí ayonem igene.

⁹ “Ami mime imapeka,” “Ami petmapeka,” “Doppyong mapeka,” “Akon atíem kaabo mapeka,” emla ayonsok kékonlote ingkuem ayon ngiitome pobitudí dem takam “Agíke kumríem agí kísape míísula ayabosu langka” emnam ayon atelsok poyindung.

¹⁰ Ayangde kumríem atímana imang. Ayademin ayonem apíímone.

¹¹ Delokrongem siyum siroke yénamem kénsudola sim ilangka. Noluke ipnge supala darngo sudíkue píngkai. Kapeila ngoluke kerape míngke sudo delokkem penem supak ngoluke turdíkue anín yangkabong.

¹² Yume gídakbong; longe píídak. Dekepe iname kaamo agérem mepak sugeyéla angun lokke mimak sérangem gelaju.

¹³ Tíngír dobat sula miri sooman, abír ajon delokke sénam monam, apan aran delokke nemín pomínem megeyéla, longe dungadape kampona bedalok ibosulangka.

¹⁴ Dem megeyéla, nolu agí agísue Ruutum Jisu Kristoke sérangem gelangka, delokke paab ségu míínamem ipíítope emla míímapeka.