PAULKE ROMKÍDÍLO ATNAM SITHIE 12 - DEENA BAIBÉL (BSI)

Yénamem Shédíke Agérlo

¹ Delok legape, bírokídía, Shédíke yaasam kolok, ngo nolum rogudung; Nolu agísue turnamem bisuna amipe, deenampe delokke Shédíme ashémola aid agérlo mínggapla yélangka.

² Sok tani amongsok yékampe yéyimape idola noluke aapíem gemosula anípe yélangka. Delomin nolu Shédíke ainam, bíkke ashéng penamem delokke aro míídongem, bíkke míínamem kénla arue emla tolíkdope kényéne.

³ Kapeila ngom binam yanggolok ngo nolum mipilem podung. Nolu agíke tetengem mííboosula bottepe míísu mapeka, dempenem Shédíke nolum binam míngkelok nolu agísue tetepe mííla aina bisarem ibosulangka.

⁴ Ngolu amíl atel lokke tarong atele delokke si tarong kídísi takame agér atelmang,

⁵ Deke kísa Kristo kelo ngolu bojé dakkom Kristokíng ngolu lekope amíl atelpe ibosudung, delokke ngolu amíl atel lokke angu angu taronge atelkope idungku.

⁶ Ngolum yanggong binam adulok amane angu angu sudung. Akonem Shédíke agomem pogedope amanem bitumílo, bím agíke míngkeng adulok depe pomotoka.

⁷ Iguldope bitumílo, bím igulkolo yémotoka, luyildope bitumílo, bím luyil poyil motoka.

⁸ Luír poírdope bitumílo, bím luír poír motoka; akon pííram namem biguldope bitumílo, bím bidarpe bimotoka; ruutum bodope bitumílo, bím mínggapla ruutum bomotoka; yaasamem bitumílo, dem bím ashérupe imotoka.

⁹ Ayangde arorupe aido. Atímanem belum langka; ainem bomgap langka.

¹⁰ Bíro kumsu ayang kísape akone akonem ankí bosulangka. Agíem aiyape akone akonem míngge bosu langka.

¹¹ Ríkso mape miríí langka. Ruutumme aapí ainalok apíípe kumlangka.

¹² Atung arééyém donggap gela, kumnamlo miriidola míínam sunamlo ashéng langka.

¹³ Shédíke pííram sémona amiem kanggul igul bosulangka. Mibuem kaalí langka.

¹⁴ Nolum irééna kídídem lubéé líklangka; béémape lubéé líklangka.

¹⁵ Ashéna kídílo ashémín langka, kapna-ríína kídílo kabbo-rííbo sulangka.

¹⁶ Akone akonem yépope yébo sulangka; adum ale imapeka, idola rumkíyana ami kídílo yébo sugotpe míímapeka. Nolu agísue kénnamrupe míísu mapeka.

¹⁷ Sékomete atímanem atí manamlok iyan sumapeka. Mipilke amig keralo aina atíem ipe emla míílangka.

¹⁸ Nolu edítko paklayédí mipilem aipe duubosupe emla míílangka.

¹⁹ Ngokke angong kídía, edo rayan sumapeka, idakkom Shédíke marlílo melík langka. Kapeila dooying kitabe podung: “Edode ngokke ngo eduem rayéku,” emla podung.

²⁰ Dempenem dooying kitabe sikepe podung: “Noluke mirue keno dumílo, bím donam bitoka; bí tíílí dumílo, bím tíípenam atíko bitoka. Dekepe ikolok, bíkke dumpolo annyingem emepe dormoyé.”

²¹ Atímanem ikum kosu mapeka, idakkom atímanem ainamlok ikum langka.