PAULKE ROMKÍDÍLO ATNAM SITHIE 10 - DEENA BAIBÉL (BSI)

¹ Bírokídía, ngokke aapí sokke míínamde delokke Israel kídíkepe Shédíkíng kumgade bulu turdokupe emla míídung.

² Kapeila bulu Shédíme mínggap neke dem ngo hakii biladung, idakkom buluke mínggapde aro kénnamlok imang.

³ Bulu Shédí kelok aana yéjii namem kénmang delokke bulu agí míídu sulok bedangem mosudung, bulu Shédíke binam yéjiinam bedalo tolík sumang.

⁴ Míngkesuna tani mipíe yéjiinamem paadope Kristomin ayonem irí líkkue.

Turnamde Takamke

⁵ Mosi bí ayonlok lenna yéjii namem sikepe pobidung, “Sim ayon kídísim igena tanide turyé.”

⁶ Idakkom míngkelok lenna yéjiiname sikepe podung, “Teyong telo séko saayéne? emla noluke aanglo míímapeka.” (Depe emnamde Kristome laayi dokupe.)

⁷ “Delokke rumkí belo sékoi tokpene? emlate aanglo míímapeka.” (Depe emnamde Kristome sikoloke laasang dokupe.)

⁸ Idola si kape emdun? “Agome nolukíng aníndung; si noluke nappa lolang noluke aanglo dung.” (Depe emnamde ngoluke pogoo bomnam míngkenge dung.)

⁹ Nolu agí nappalok, “Jisu bí Ruutume” emla pokansula delokke Shédí bí sikolokke bím kiirep toku emla arope míímílo nolu turyé.

¹⁰ Kapeila noluke aang lokmin nolu arope mííla yéjiinape sanko sudune delokke noluke nappalok nolu sikarsula turdungkune.

¹¹ Dooying kitabe sikepe podung, “Bím míídasuna miyongem edílokom annying momayé.”

¹² Kapeila delo Judai kolang Mipakko kangu sumang Ruutum atele takam lokke Ruutume delokke bíkke amínem gokna takamem bí edíípe yanggongem bidung.

¹³ Legade Dooying kitabe podung, “Ruutumke amínlok gokna miyode turyé.”

¹⁴ Demílo kape kísa buluke míngke suma namlok igul koyéne? Delokke buluke tatkí manam dem kape kísa bulu arope mííyéne? Akone bulum poyil mamílo kape kísa bulu tatyéne?

¹⁵ Poyilna kídídem melíkmape kape kísa bulu poyéne? Dooying kitabe sikepe podung, “Tatpona dooyingem pogoona kídílok ale kídíde edítko kampodun!”

¹⁶ Idakkom Israel takame tatpona dooyingem torík sumang. Kapeila Isaiah sikepe podung, “Ruutum séko ngoluke dooyingem arope míínako kadun?”

¹⁷ Dekepe iname míngkede dooyingem tatkolok aadung, delokke dooyingem Kristoke agomlok tatto.

¹⁸ Idola ngo íngkídung, bulu agomem tatmanía? Bulu tattorung: “Buluke adude tani among tabuso gígongkai, buluke agome tani among kéényulo byargongkai.”

¹⁹ Lekoda ngo íngkídung, Israel amikídíe sim tatkén manía? Kerape Mosi bí podungai: “Ngo angu opín kídílok nolum nemoyé; ngo kénmana angu opín kídílok nolum marmoyé.”

²⁰ Delokrongem Isaiah bí miramrupe podung: “Ngom mata manakídíe ngom paatoku; ngom mata mana kídílo ngo agíe lengkansuto.”

²¹ Idakkom Israel legangem bí podung: “Longe rubungem agom tatmana kídí lolang delokke ipatsuna kídíem ngokke alage leemosula yamríkto.”