POBENG BINAM 9 - DEENA BAIBÉL (BSI)

Ami Kídíke Ipésuname

¹ “E Israel, tatgap langka; Silo nolum pemílo tolyana mibo miying opín-buang kídíke asi-among kídíem yékam aabomdope Jordan korongem nolu koodak. Buluke bottena doolung kídíke etor yapgo kídíe taleng telokkai idung.

² Ami kídíde bodí-botte ila kedonla migo mimat Anakim amieke. Nolu bulum kéndung delokke, ‘Sikena Anakim ami kídíem séko dakrík sulayén?’ emla buluke legang ponamem nolu tatto.

³ Idola nolu sim berokpe aido, Ruutum noluke Shédíbí meyoe telokkai dorna emepe noluke keralo konggela rotkon elo gígeyé. Bí, bulume nyokmola noluke ale rumkílo imoyé. Nolu bulume monpakyé delokke Ruutumke nolume pésunam akorpe bulume menarupe nyokyinmoyé.

⁴ “Idola, edílo Ruutum noluke Shédí bí, bulume noluke keraloge monpakyédí, delo nolu, ‘Ngokke agísu deenam lokmin, sim asi-among sim ngome yébomdope Ruutum bí bomatone,’ emla mipil-miyongpe manmapeka. Dekemang, ami kídí delokke atírumanam legang pemino, Ruutum bí noluke keraloge bulume monpakyéne.

⁵ Noluke agom-aang tadkolok demangkom noluke ainamlok, asi among dem nolu yébom mayé, idola noluke buku kídí: Abraham, Isaak delokke Jakobke keralo Ruutum noluke Shédíbí ingkokodí pésula togesutodí, deme ipíngla, delokke mibo-miying ami kídí delok atírumanam legang pemino bí bulume monpakyéne.

⁶ Dekepeila, Ruutum noluke Shédíbí, sim gaina asi-among sim noluke deenam legape nolum yébomdope bimang. Sim nolu kénsulangka. Kapeila nolu miké amieke.

Mimang Kumsunamde Paabe

⁷ “Yépol mooruk amolo kapekísa Ruutum noluke Shédíme nolu mardope imotodí, deme mííyar gelangka. Ijipt amonglok noluke gílendoku longe delokke ila supak loope, nolu Ruutum ke mirolpe roltídung.

⁸ Horeb dííte delo nolu Ruutum me iyakla, nolum nyokmodope marmoto.

⁹ Edílo ngo dííte delo elíng líítam annyidem laaríksupe emla saatodí, dekepe nolukíng Ruutum ke daapong ibosunam líítam annyidem laadodem, ngo looying appi kolang yoying appiko dííte delo duuto. Delo ngo doma-tíímape duuto.

¹⁰ Ruutum bí, ngome Shédíke agí lakkéng lok atlík sunam líítam annyiko bito. Delo líítam annyi delo, gídum sudo longe delokke emelok Ruutum ke noluke keralo dííte delo pokan binam bíkke lulígnam tabungem atlíkto.

¹¹ “Looying appi kolang yoying appi méélam delo daapong líítam annyi dem Ruutum bí ngome bito.

¹² Depe bidola Ruutum bí ngome políktoku, ‘Menape soge no tokka kuka. Kapeila nokke Ijipt amonglok laalenkunam ami kídíe deeyimang. Bulu ngokke adulok gíyimape, mimangko buluke supe písukai.’

¹³ “Delokke Ruutum bí ngome poto, ‘Ngo ami kídar sim kaayinkai. Bulu arope miké amirungeke.

¹⁴ Teyong among telo buluke amín kídíe kaimadope, ngo bulum nyokyin modope ngome no lutum mapeka. Depe ipala nom ngo, bulum pemílo milung-abam yala edíí-siríyana opín lokke abupe imoyéku.’

¹⁵ Depe pokolok, dííte delokke emepe írdungem ngo gílat sulangkula oitoku. Delokke daapong lokke líítam annyidem ngok alag annyi so bomtoktoku.

¹⁶ Delo ngo edílo nolum kaatodí, Ruutum noluke Shédíke mirupe nolu paab ikai. Nolu gooru ruo moimuangpe agísu legape mimangko píto. Nolu Ruutum ke nolum lulígnam bedanglok gíyimape menarupe angukonpe ipatsukai.

¹⁷ Depeila ngo noluke kangkolo, líítam annyi dem ngok alag sok geletla benmíkdupe getírto.

¹⁸ Depe irongem lekoda ngo looying appi kolang yoying appi kope Ruutum ke keralo gubla kumtítoku. Ruutum ke kangkolo noluke atímape ila, paab ila, bím marmola ikolok dekepe ngo lekoda doma-tíímape nyotoku.

¹⁹ Ngo Ruutum ke aklíla marnamem pesoto, kapeila nolum nyokmo ladope bík marnamde yagorupe marto. Idola lekoda ngok agomem Ruutum bí tadbito.

²⁰ Bík marnamde Aaronke teyong looteng bím nyokmo ladope yagorupe marto. Idokom delo ngo, Aaronke legang pete kumbito.

²¹ Ngo noluke paab ekurang pínam rubo mimang demte emelo romto. Depe irodem, deme dírmíkla, demulpe nyotdípla, dem demul deme, díítelok bíttokna asi korong delo yoplíkto.

²² “Nolu Tabérah, Massah delokke Kibroth Hattaabah loote Ruutum me marmoto.

²³ “Delokke edílo Ruutum bí nolum Kadésh Barnea lok nolume, ‘Ngokke nolum yébomdope asi-among binamem laala dunga bomlangka,’ emla Ruutum bí lulígtodí, delote nolu, Ruutum noluke Shédíke lulígem ipatsula, bím arope míímape, bík agomem tadmato.

²⁴ Nolum ngokke kénlen delokkake ila nolu míípésuna ami rungeke.

²⁵ “Nolume petnyokyé emla Ruutum bí mankolok ngo Ruutum ke keralo looying appi kolang yoying appiko gubla kumtíto.

²⁶ Delo ngo Ruutum me kumla poto, ‘E Ruutum Shédí, nok amisu kídíem nyokmo mapeka. Bulu nokke agíke lakbí ralnamlok Ijipt amonglok laalen kuname delokke nokke agíke ipít sulennam agí amisue.

²⁷ Nokke béérangpe ina Abraham, Isaak delokke Jakobme míípang sulangka. Buluke aapí-aang mikénamem, buluke atímang emlang buluke paabem kaabong bilangka.

²⁸ Depe no imayémílo, nokke ngolume laalenkuko amongde sikepe emyé, “Ruutum bí, agíke tolík sunam amolo bulum langaang kula mala, buluke teyolo bí kangkila, bulume mooruk amonglo petyinto.”

²⁹ Bulu nokke lakbíng ralnam loklang nokke agíke botteruna ilanana lok, agíkesupe laalenkunam, nokke agí ami kídísue.’