POBENG BINAM 8 - DEENA BAIBÉL (BSI)

Ruutum me Mitpan Sumapeka

¹ “Siloke ngokke nolum poyilnam agom gompil miyong sim airupe ansula igelangka. Depe imílo nolu turla, milu-mibampe parla, noluke buku kídílo Ruutum ke pésula tolíksuko asi-among delo aala yébomyé.

² Noluke aapí-aangem ikaape, noluke teyolo bíkke lulígem igeyédí igemayédí emla kangkípe delokke nolum ikaa-darkang kíla, nolume aapí-aang remyakdope siddína takying appi so, yépol mooruk amonglo Ruutum noluke Shédíke gíbonamem nolu airupe míípasu langka.

³ Tanie donam-tíínam petom lok turmang idola Ruutumke nappang lok lenna agom gompil miyong lokmin arope turdune emla poyilla lengkanpe nolume aapí-aang remyakmola, nolume akii keno mopala, noluke abu kídí elang noluke kénkí hényi manam manna lok dobola ikanto.

⁴ Takying appi kídí delo, noluke ege galuge ínmato delokke noluke ale kídíe bíímato.

⁵ Depeila noluke aapí-aanglo sim kén-gap gepe aido. Tanie agíke ome-uem kape kísana ségu-sialok usaa dudí, deke kísana ségu-sialok Ruutum noluke Shédíkom nolum usaadung.

⁶ Ruutum noluke Shédíke lulígnamem, bíkke yéyon adongpe yémín gela bíme airupe míítesula igap gelangka.

⁷ Kapeila Ruutum noluke Shédíbí nolum ingkona among lodí korong roojik kídíe kala, asi paatang kídíe kala, adi among lolang yiibe kídílo asi uusangkue kala, korongpe bídla,

⁸ ingkona among lodí, géhue lang ayage, onggur ayé lang donam tapang ayé, dalime lang olib téle delokke ngullange kadudí,

⁹ ingkona among lodí donam-tííname dírí-keno kamape, miremlok jéko amongpe idudí, ingko among lodí, líídu-lííreng kídíde arempe ila, dííte kídí lok taam em koopa dudí, dekena gairuna moone amonglo bomadung.

¹⁰ Edílo nolu aapí-aange apíírupe dola-tííla iyédí, delo nolu dekena gairuna moone amongem Ruutum noluke Shédíbí nolume binam legape nolu bím yidgelangka.

¹¹ “Ngokke nolum siloke binam, Ruutum ke ayon kídí simlang lulígnam idong kídí sim, nolu iramgela, Ruutum me mitpansula yémadope nolu an-gap sulangka.

¹² Depe imayémílo, edílo nolu donam-tííname jéyédí, edílo nolu gaina ekum kídíem mola dungayédi,

¹³ edílo noluke gooru, mér sobén kídíe parla, noluke baldín elang uun kídíe bojémomo ila noluke ato-siro bomnam takame mirempe irepyédí,

¹⁴ delo noluke aapí-aang kídíde míngkímsula, noluke abílpe yékíko Ijipt among belok nolum laalenkuna, Ruutum noluke Shédíme nolu mitpansuyé.

¹⁵ Ruutum bí nolume, tabí elang képkonge bíísétko, asi kamape ila tíílíng-keno kako, yirí-pedípe míínam bortakna yépol mooruk amonglok gíboto. Bí lííreng lok nolum asiem laalenboto.

¹⁶ Noluke yéname méélamlo ai-kamporupe yédokupe, nolum yépol mooruk amonglo noluke buku kídíe kénkí manam mannaem domola, nolum ikang-darkang kíla, nolum aapí-aangem remyakdope bí ito.

¹⁷ Nolu sikepe emsulado, ‘Ngoluke agíke lakbíng ralnam loklang ilasunam lok sikena miremem ilensutung.’

¹⁸ Idola arolo aayékuem Ruutum noluke Shédímin nolum jéla, mirem dope ruulenbine. Sime nolu mínggap gepe aido. Bíkke sikepe igade, noluke buku kídílo bíkke daapong ibosula togesunamem silo loope bí edíípe bomgapdung.

¹⁹ “Ruutum noluke Shédíme nolu arope mitpansula angukon uyu kídíem, kumsula, bulum agér-anam ibila edílo nolu iyédí, ngo arope silo nolum lutordung; nolum arorupe nyokyinmoyé.

²⁰ Ruutum noluke Shédíke agom-aangem tadmape nolu imílo, noluke keralo Ruutumke nyokmonam mibo miying opín kídí akampe nolumkom nyokmoyé.”