POBENG BINAM 5 - DEENA BAIBÉL (BSI)

Lulígnam Ngiitom Íying Kídíe

¹ Mosibí Israel takamem tomdumsula poto, “E Israel kídía, noluke tatkolo ngokke pokan binam siloke ayon takamem tatlangka. Dekedem kénlangka delokke igelangka.

² Horeb díítelo (Sinai dííte) Ruutum ngoluke Shédíbí ngolukíng daapong ibosuto.

³ Sim daapong sim ngoluke buku kídí petomlo ibosurímang, idola silo loope turna ngolu takam kíng ibosuto.

⁴ Dííte delo emelok Ruutum bí mikmoe geríksula nolum luposuto.

⁵ Depe ido delo ngo Ruutum keelang noluke pénsamlo, Ruutum ke agomem nolum pokan bikupe dagto. Kapeila nolu eme dem pesola dííte delo resamato. Delo bí poto:

⁶ “ ‘Ngomino noluke abílpe iko Ijipt among lok nolum laalen kuna, Ruutum noluke Shédíbí.

⁷ “ ‘Ngok kékonlo, nolu abíd uyu kumsumapeka.

⁸ Nolu agísu legape teyonglo duuna demangkom tani among so duuna demangkom among arangke asilo duuna moimuang atílok mimang pímapeka.

⁹ Nolu buluke keralo gubamapeka demangkom bulum kumsumapeka. Kapeila Ruutum noluke Shédí ngo, nena Shédíko. Ngom akna kídílo siirum angum-appi loope abu kídí paab ayanpe ome-oo kídílo edo rakunako.

¹⁰ Idola séko buludí ngom ayangla, ngok lulígnamem igeyédí, dekena teyolo éjar-éjar siirum loope ngok ayangem lengkanne.

¹¹ “ ‘Nolu ngok amínem mínsam mapeka, kapeila ngok amínem mínsamna teyolo, Ruutum noluke Shédí ngo ingééyé.

¹² “ ‘Ruutum noluke Shédí ngokke lulígnampe, Sabbath longem deenampe melangka.

¹³ Nolu longe akkélo noluke agér-anamem ilangka.

¹⁴ Idola longe kíníd nanade Ruutum noluke Shédíke Sabbathe. So nolu lang noluke ome-oo kídíe, noluke béérang kídíe, noluke simon-sili kídíe delokke noluke amonglo duuna mibo-miying kídíe sékote agér imayé. Depe imílo noluke béérang kídíete noluke kísa apééyé.

¹⁵ Nolu Ijiptlo abílpe yéla, Ruutum noluke Shédíbí agí lakbíng ralnam lok yamtarla nolum laalen kunamem míípa sulangka. Depeila Ruutum noluke Shédíbí nolume Sabbath longe sime nyodope lulígdung.

¹⁶ “ ‘Ruutum noluke Shédíke lulígnampe, noluke ane emlang abuem airupe mínggela yélangka. Depe imílo, ai-kampope nolu oolooko turla yéyé.

¹⁷ “ ‘Nolu moka mapeka.

¹⁸ “ ‘Nolu abír-ayo imapeka.

¹⁹ “ ‘Nolu doppyoo mapeka.

²⁰ “ ‘Nolu repe-sinying akonke legape menam agom pobimapeka.

²¹ “ ‘Nolu repe-sinying akonke ekum-erangem kaabomapeka, bíkke mimem demangkom bíkke béérang kídíem demangkom bíkke taro kídíem demangkom bíkkelo ato-siro duuna tabungem kaabomapeka.’

²² “Sike simoko noluke mití-maglíng keranglo, dííte delo eme aralok, lulígnam kídíe. Sok teyong so abídyang potem mato. Delo bí dekedem líítam annyi kolo atpala ngome bito.”

Ami Kídílokke Pesoname

²³ “Edílo nolu díítede emelok írla delokke kaamo aralok adudem kaato-tattodí, noluke opín-buang takamke abu-miro kídíe ngokkíng aala,

²⁴ bulu lupoto, ‘Ruutum ngoluke Shédíbí bíkke angun-abé emlang mite-ralnamem lengkan sudung, delokke eme aralok bíkke adudem ngolu tatto. Shédí bí amikonem lupo-manmo sudokom de amide turdung emla ngolu silo kaato.

²⁵ Idola supak ngolu kape siyén? Ruutum ngoluke Shédíke adudem bojéyape tatmílo, si bottena eme si ngolum gukala ngolu siyinyé.

²⁶ Kapeila ngoluke kísape emelok, turna Shédíke agom podudem tatla ingko tanieda turla yénako kadun?

²⁷ No anín elo gíala íngko agom ekedí, Ruutum ngoluke Shédíbí podune, dem tatyin pala Ruutum ngoluke Shédíke agomem ngolum polangkuka. Ngolu dekedem tatla igeyé.’

²⁸ “Noluke ngome luposunam kídí dem Ruutumbí tatla ngome poto, ‘Ami kídí sokke nom agom ponam kídíem ngo tatto. Buluke ponam takamde aido.

²⁹ Bulu dekepe aapí-aange geyarduamílo, bulu agínpe ngome arope mííla ngokke agomem tadbiduamílo edítko aiyan. Depe bulu iduamílo buluke teyolo lang buluke oten ome-oo kídílo ato takame ai-kampope iyaryai.

³⁰ Bulume agí tombu kídílo gílat sudokupe polangka.

³¹ Idola, nodan ngokkíng so duumín gepolangka. Ngokke binam buluke yébom kupenam asi-amonglo bulu igedokupe, no bulum luyildope ngokke lulígnam kídí emlang ayon kídíem ngo nom biyé.’

³² “Depeila Ruutum noluke Shédíke nolume lulígnam kídíem ansula igelangka; dekedem korboola lakképe demangkom lakbíkpe gímapeka.

³³ Dem takam dem igelangka. Depe imílo noluke yébompenam among delo nolu ai-kampope yéla nolu yéyarbomyé.”