POBENG BINAM 18 - DEENA BAIBÉL (BSI)

Miri Kídíke Paapenam Adue

¹ “Miri opín-odongpe ina Lebi opín-buang tabunge, Israel kídílo lekope, yége-dagge penam asi-among tarongem paamín gemayé. Delok ayanpe Ruutum keepe emelok romlíknam aman kídí delokke abíd sobo aman bidumsunam lok bulu yéke-dakkeng geyé.

² Israel bíro kídí abíd aralo bulu asi-among tarong paamín gemayé. Ruutum ke togesunam adupe, buluke Ruutum ke keralo miri agérpe inamde buluke tarongsue.

³ “Edí-edílodí ami kídíe gooru demangkom mérko sobope payédí delo miri kídí tarongpe: laktígem, sokkorem delokke akiiem tekbilangka.

⁴ Nolu lentí len-gona ali-ayéme, asi-apongem, olib tél emlang kerayalumpe mér amíd ngílennamem bulume bilangka.

⁵ Kapeila noluke opín takamke aralok Lebi opíndem, Ruutum noluke Shédíbí, bíkke miripe ila buluke oten siirek loope bíme agér iyar bidope ullento.

⁶ “Lebi amikone, bíkke dungako, noluke doolung akon kolok gílenla Ruutum ke tonam moolop delo ashéng-angamrupe aala,

⁷ abíd Lebi ami kísa miri agér ikampe, Ruutum bíkke Shédíke miri agérem bí géryémílo,

⁸ abíd miri kídíke donam-tíínam tarong pangkampe, bíkom paamín gepe aido. Delok teyong delo, bíkke edung-erangke melíg binam kídíemte bí mesing sulado.

Belumnam Ségu Kídíe

⁹ “Ruutum noluke Shédíke nolum asi-among binam delo edílo nolu pííyédí, delo mibo-miying kídíke belumnam ségu-siang kídíem nolu kaayil sumapeka.

¹⁰ Noluke aralo agíke ome-uem runggulo romnam ipak amanpe ilíkla, líímé-tagil ila, rogyin kaala, immang pobi goola, miri lugola, mooya-montro igola,

¹¹ demangkom pengé lugola, uyu miripe ila, urom tomgola, aid miripe igola ina ami kape aimang.

¹² Séko buludí, dekepe igoyédí, de Ruutum ke kangkolo belumrunam amie. Dekepe inam legapemin Ruutum noluke Shédí bí, dekena mibo-miying kídíeme, noluke kerang kerangpe mon-gé biyéne.

¹³ Ruutum noluke Shédíke keralo, nolu lupenam amipe ipe aimang.

Kaaluna Miri Legange

¹⁴ “Noluke monbín penam ami kídíde líímé-tagil ila, rogyin kaala ina agom-aangem taddung. Idola Ruutum noluke Shédíbí nolum dekepe idope elíkmang.

¹⁵ Iname deke delokke ayanpe Ruutum noluke Shédíbí, noluke Israel kídí arasulok, noluke legape kaaluna miriko melígyé. Bí ngokke kísa iyé. Iname nolu bíkke agom-aangem tatlangka.

¹⁶ Horeb díítelo noluke dumsudo longe delo, ‘Ngolu, Ruutum ngoluke Shédíke agom ponamem tadmangkom delokke bíkke botteruna eme me kaamangkom. Dekepe imílo ngolu siyínyé,’ emla noluke rogu bomnamde simoko.

¹⁷ Delo Ruutum bí ngom poto, ‘Buluke ponam kídí si aidung.

¹⁸ Buluke agí ami arang sulok, nok kísa kaaluna miriko ngo melígbiyé. Ngokke agomem bíkke nappanglo líkyé, depe irongem ngokke bím lulígnam tabungem bí bulum pokanbiyé.

¹⁹ Ngok amínlok agom pona, kaaluna miri delokke ngok agom kídíem tadmana amidem ngo agísue íngkí-bengkíyé.

²⁰ Idola kaaluna mirikone ngok amínlok, ngokke lulíg manamem pogotmape poyémílo, demangkom angukon uyu kídíke amín lok kaalula poyémílo, dekepe pogona dem mokape aido.’

²¹ “Nolu sikepe embosulado, ‘Ruutum ke polík manam agom dem kapekísa ngolu deke emla kényén?’

²² Delo, kaaluna miri konke agom dem Ruutum keelok podung empala agérde dekepe imayémílo demangkom aro líkmayémílo, dem agom dem Ruutum bí políkmang. Dekepe kaaluna miride agí mínggosupe pone delokke bíme nolu pesomapeka.”