POBENG BINAM 14 - DEENA BAIBÉL (BSI)

Pengé Luyém Igepemaname

¹ “Ruutum noluke Shédíke ome-oo kídíe nolu. Edílo nolu sina ami legape pengé lula kapla-rííla iyédí, delo nolu agíem gatsula demangkom noluke dumpong kerang deme ngíbínsula ibosumapeka.

² Kapeila Ruutum noluke Shédíke keralo deena amie nolu, tani among arang sokke ami kídí takam arang lok agíke gairuna atorusupe Ruutum bí nolum ullensuto.

Deene lang Deemana Taro Kídíe

³ “Deemana ato-siroem domapeka.

⁴ Sim simon-sili kídar sim nolu dolado: gooru, mér, sobén,

⁵ dumsung, sisuk, sune, moonam sobén, sibén, sidum delokke díítelo yéna mér.

⁶ Nolu lepuge lebogla dogung gungkuna taro kídíem dolado.

⁷ Idola dogung guudola lepuge apíírupe lebogpe imana, uut simon, piripogo, demangkom líírenglo yéna piripogo kídí sime domapeka. Kapeila bulu dogung gudokom buluke lepuge lebogpe imang, iname bulu dormo ayon lok deemang.

⁸ Éékde deemang, de lepuge lebogpe ituakom dogung guumang. Nolu deke kídíke adínem domapeka, delokke simang emte ukkímapeka.

⁹ “Asi aralo yéna kídí aralokke tarku gela, méper-lapper kana takamem dolado.

¹⁰ Idola tarku kamanape, méper-lapper gemape ina kídíem domapeka, kapeila noluke legape de deemane.

¹¹ “Nolu pettang aralo deenem dolado.

¹² Idola sike sim nolu domapeka: Míya, sogum, yakana sogum,

¹³ yalína tunsik, yakana tunsik emla atí-atípe ina mísung kídíem,

¹⁴ atí-atípe ina paak kídíem,

¹⁵ areng kísape gena pettun, loyid pettun, siyéng pettang emla atí- atípe ina pemí.

¹⁶ Améngona pettun tundang, yasina pettun,

¹⁷ mooruk pettun, kedonla alínge bodona pejap, engo pona,

¹⁸ delubore, atí-atípe ina longkurang, lene-perok delokke tappon kídíem.

¹⁹ “Yopgoona takom-taruk tabungde noluke legape deemane. Bulume domapeka.

²⁰ Idola takom-taruk aralo deenem nolu dolado.

²¹ “Agíe sisuna ato-siroem domapeka. Noluke aralo duumín gena mibo-miying amiem domolado, demangkom mibo-miying moolok akonlo kolado. Idola nolu agísuedan, Ruutum noluke Shédíke deena amisue. “Nolu anyun tíídung adana méro demangkom bénoem keemapeka.

Íying Sanpek

²² “Dítak miyonglo, noluke arík kídí lokke lenna kídí lok, íying sanpegem ingusulangka.

²³ Dekepe ingusula, Ruutum noluke Shédíke keralo, bíkke amínem duumodope, bíkke moolop toko delo, noluke ali-ayéke, asi-apongke, olib télke delokke gooru lokkela mér sobén kídí lokke íying sanpek amanem dobo-tííbo sulangka. Depe imílo Ruutum noluke Shédíme nolu agínpe míítesula yéyaryé.

²⁴ Idola Ruutum ke agí amínem duumodope emla toko moolopde mootengla, noluke teyolo, Ruutum noluke Shédíke utepooro ruulík kolok, nolu jéla, noluke íying sanpek dem bomang lamape iyémílo,

²⁵ delo noluke íying sanpek kídíem abalpe ila, dem abal kídíem Ruutum ke tonam moolop delo bomala,

²⁶ nolu dem abal kídídem: gooru, mér sobén, asi-apongpe demangkom bier alangpe demangkom noluke agí míngkorsupe rela, edung erang tabungem lekope Ruutumke keralo dobo-tííbosula ashéng-angam ibosulangka.

²⁷ Noluke dekepe idungem, agíke yége-dagge supeko among tarong paamín gemana Lebi kídíem mepak sumapeka.

²⁸ “Tagum miyonglo, noluke ilennam íying sanpegem agí-agíke doolung kídílo bomdumsula mekum bosulangka.

²⁹ Depe imílo, noluke doolung kídílo duuna, agíke yége-dagge supeko among tarong paamín gemana Lebi kídíe lang mibo-miying kídíe, ane abu kaimana ome-oo kídí elang mime meyéng kídíe aadumsula dobo-tííbosula aang píípe ashéng bosula ibosulayé. Depe ibosumomílo noluke alag uganam takamlo Ruutum noluke Shédíbí nolume utepooroem ruubiyé.”