POBENG BINAM 1 - DEENA BAIBÉL (BSI)

Horeblok Gídokupe Lulígname

¹ Si agom kídar si, Israel kídíke Jordan korong sanggodan lokke, yépol mooruk amolo duudungem, Mosike ponam kídíe. Delo bulu Paran keelang Tophel, Laban, Hajeroth, delokke Dijahab pénsamke Jordan korong yiibelo duuna Suph lokke kékon Arabahlo duuto.

² (Deme Seir díítum bedalok gímílo, Horeb lokke Kadesh Barnealo píípe looying kola lootelko enlík dungai.)

³ Dítak íying appi lokke poolo íying kolang atelke, kerang longe delo, Israel kídí legape Ruutum ke lulígnam tabungem, Mosi bí Israel kídíem pokan goobito.

⁴ Dekepe pokan goodode, Heshbon doolung luune delo, Amorit kídíke Sihon bí rojape ila, delokke Ashtaroth lolang Edréi doolung luune kídí delo, Bashanke Og bí rojape ila, bínyim Ruutum ke mimaklo ikum rongem ito.

⁵ Ami kídí lokke, Jordan korong sanggo danlo duuna Moab among gooralo yédungem, Mosi bí sim ayon kídí sim poyilla pokan goobito.

⁶ “Horeblo Ruutum ngoluke Shédíbí ngolum poto, ‘So dííte so nolu ool rungko dungkabong.

⁷ Depeila nolu sokke gílangkula, Amorit kídíke adi among danpe, delokke Arabah lokke dei-degong ami kídí dungko adi amonglo, yiibe amolo, Negeblo delokke siyéng robeng kídí lokke ila, Kanaan amonglo, delokke ila Lebanon pelang korong bottena, Euphrates loope magoola gígolangka.

⁸ Kaatola sim asi among sim ngo nolum bito. Delo gíla asi-among dem bomlangka. Kapeila dekedem, noluke buku kídí: Abraham, Isaak delokke Jakob bulum lang buluke otíng-oyin kídíem biyé emla Ruutum bí pésuto.’

Miro Kídíem Ulname

⁹ “Dekepe idodelo ngo emto, ‘Nolume ngo agí atele gela sumayé.

¹⁰ Ruutum noluke Shédíbí, nolum bojérupe amiem parmola, silo melo nolu taleng telokke takar kísa ikai.

¹¹ Ruutum noluke buku kídíke Shédí bí, nolum éjar éjarpe amiem parmola, bíkke pésunam tuubupe nolu kelo utepooroem rubi daklangka.

¹² Idola kape kísa ngo agí atele, nolu takamke egedem gela, ebín eson emlang piyyang takamem kaabilayén?

¹³ Noluke opín buang mipil aralo, kénna-paana ségu kasuna delokke yidnam amilok ultoka. Dekedem ngo nolum kaabom-tadbom dope, ilík biyé,’

¹⁴ emla ngok mannamem nolu, ‘Nokke ponam agom de aidung,’ emla tolíkto.

¹⁵ Depeila, ngo noluke opín buang mipilke aralok, kénna-paana, delokke yidnam amilok ullenla, midum éjarem lulígbona ruutum pelang, midum língko lokkelang, midum íying pilngo keelang midum íyingke, delokke opín-buang kídíke mirope nolum kaabom-tadbomla yébodope ilíkto.

¹⁶ Dekepe ido longe delo ngo noluke miro kídíem sipe poyilto, ‘Noluke ami kídíke lumín-manmínem, airupe tadbi langka. Noluke agí amisuke piyya dokom demangkom nolukíng duumín gena mibo miyingke dokom, buluke kebang takamem ai-kampope lubilangka.

¹⁷ Kebanglo akonem míílumla, lungu-lurasumape, amé botte kaamape jonnampe lubilangka. Séko memkom pesomapeka, kapeila noluke kebang lubinamde Shédí keelokmin aadun. Noluke lula sumanam kebangko kayémílo ngokkíng bomalangka, dem ngo kebangem baabiyé.’

¹⁸ Delo ngo nolum, agér-anam takam ipenamem pomík bila poyilto.”

Asi Amongem Yarkanggoona Ami Melíkname

¹⁹ “Delok rongem Ruutum ngoluke Shédíke ngolum lulígnampe, ngoluke kaanam reyubna, monggíng bottena, yépol mooruk among delok gíla, Amorit kídíke adi amongpe gíla, ngolu Kadesh Barnealo pííto.

²⁰ Delo ngo nolum poto, ‘Ruutum ngoluke Shédíke ngolum binam, Amorit kídíke adi amonglo nolu píídung.

²¹ Kaatola Ruutum noluke Shédíbí, nolum amodem tolík bitung, dekepe ila Ruutum noluke buku kídíke Shédíke pokampe, nolu gíla asi amongdem laalangka. Nolu aapíe améng mapeka, demangkom pesomapeka.’

²² Delo nolu takame ngokkíng aala poto, ‘Ngoluke legape, asi among sim yarkang goopena amilok megelíkla, bulu ngoluke bedu bedang gípekuem kanggong gela, ngolum pokan langkula, delokke ngoluke gípeko doolung kídíeme, ngolu kénto sudope lulíklaju.’

²³ Deme ngo aipe tatla, opín-buang miyonglok, atel atelpe ullenla midum íying kolang annyiko noluke aralok ngo ullento.

²⁴ Bulu gílenla, adi amonglo gíla, Eshkol yiibelo pííla, asi amongdem yarkang gooto.

²⁵ Asi among kídí delokke, siipí-siiyé ayoko bomlang kula, ngolume legí-sigangem, ‘Ruutum ngoluke Shédíke asi among binam si ainako,’ emla pobitoku.”

Ruutum me Mirolpe Ibomname

²⁶ “Idola nolu gílímato. Ruutum noluke Shédíke lulígnamem mirolpe ibomto.

²⁷ Nolu agí agí tombusulo sikepe lugeto, ‘Ruutum bí ngolum kangkidung. Depe ilamin, ngolume Amorit kídíke alaglo melíkla, ngolum nyokmodope, bí Ijipt amolok ngolum laalentone.

²⁸ Ingkolo ngolu gíyén? Ngoluke bíro kídíe ngolum aapí-aang améng moto.’ Bulu sipe emtoku, ‘Ami kídíe, ngolum pemílo bodong botte yala ralyaneeke. Doolung kídíete bottela, taleng telo píídope língkum etorem itung. Ngolu Anakimke (Migo-mimat) otíng oyin emte deke delo duudupe kaato.’

²⁹ Delo ngo nolum poto, ‘Nolu pesolok yirí-pedípe míímapeka, delokke bulume pesomapeka.

³⁰ Ruutum noluke Shédíbí, Ijiptlo noluke amig keralo, nolu kepe kape kísa itodí, dekepe bí noluke kerangem gígela, nolu keepe mimak mogela igebiyé.

³¹ Delokke yépol mooruk amonglo, abue kape kísa agíke uem bodudí, deke kísape, Ruutum noluke Shédíbí, nolume bolangala so among soope pííbonamem nolu kaayinsuto.’

³² Sikepe ilate nolu, Ruutum noluke Shédí me arope míngke sumato.

³³ Bí kerang kerangem magela, noluke notko ipekuem kangge bila, nolume kaamo yohlo emepe, delokke longeme doomugpe igebila bedangem sutkan bituai.

Israelem Ruutum ke Ajéng Iname

³⁴ “Edílo Ruutum bí, noluke lugenamem tatsutodí, delo bí marla yagorupe pésuto,

³⁵ ‘Noluke buku kídílo aina asi among sim biyé emla ngokke toge subomnam sim, si atírumana siirum sokke midum atel kokom kaapamayé.

³⁶ Idola Jephunneh ke oo Kalebbí, agíke aapí-aanglok, apíírupe ngok agom-aangem tatla igenam legape, bí asi among sim kaapayé. Sok teyolo, bíkke ale tuangko asi-amongem, bík otíng-oyin kídíemla bíme, ngo biyé.’

³⁷ Noluke legape Ruutum bí, ngok teyolote marbomla sipe poto, ‘Nokom among delo aamayé.

³⁸ Idola nom igulna Nunke oo Joshuabí aayé. Bím aapí-aang edíídope polangka. Kapeila asi-amongdem yébom-dagbom dope bí Israelem yéboyé.

³⁹ Ainem lang atímanem kénpan sumana, supakke noluke ome-oo kídíe, asi-among delo aayé.’ Noluke, ‘Miru hogonge ngoluke ome-oo kídíem umyé,’ emla manbomnam, noluke koo kídíem ngo asi-amongdem duubom-dagbomdope bulum biyé.

⁴⁰ Idola nolu ami kídí noludan, Silíng Siyéng bedangpe gílat sulang kula yépol mooruk amongpe gílang kuka.”

⁴¹ “Delo nolu poyan suto, ‘Ngolu Ruutum ke mirupe paab ito. Ruutum ngoluke Shédíke lulígnam tuubupe, ngolu gíla mimak momínsuye.’ Depe embosula nolu mipil-miyongpe mimak leemo mola, adi amongdem iporupe ilayé emla mííyinto.”

⁴² “Idola Ruutum bí ngome poto, ‘Bulume mimak makma dope polangka, kapeila ngo bulukíng yémín gemayé, iname bulume mirue ikumyé.’

⁴³ “Depe pokolok ngo nolum popato. Idola nolu tatmato. Nolu Ruutum ke lulígem ipéésula, nolu agí míngkím lok adi amongpe mimaklo ento.

⁴⁴ Adi among delo duuna Amorit kídíe, noluk teyolo tangut kísape aabomla, nolum ikumla Seir lokke ila Hormah loope montoku.

⁴⁵ Delo nolu aalat sulangkula, Ruutumke keralo kapgu rogutoku. Idola noluke depe kapgu rogukunam dem, bí tatkí teríla noluke keralo bí nyorunge ruubéto.”

Yépol Mooruklo Yénam Dítak Kídíe

⁴⁶ “Depeila nolu, deddína longeko Kadéshlo duutípooto.”