PHILIPIA 3 - DEENA BAIBÉL (BSI)

Aro Yéjiiname

¹ Luyin yalumpe, ngokke bírokídía, Ruutumkelo írgape ashélangka! Atyanam atelem atdokom de ngokkepe atgot nammang delokke si nolum lusing posing komino.

² Dem ekii kídídem, atímape agér ina amikídí dínbíng gatsuna kídídem ansulangka.

³ Legade ngolumin aropakpe dínbíng iyod sunamem paanade, kapeila ngolu bíkke Aidlok Shédíme kumsuna delokke Kristome ngoluke yénamlo lekobosula írgape ashéne.

⁴ Ngo agíe dínbíílo míídíng sugíngko kadungai. Akone dínbíílo míídíng sugíngko kadung emla míídumílo, ngorange pakyange.

⁵ Longe píínyi nanalo ngo dínbíng iyod sune. Ngo odong lokke Israel amie, Benjaminke opíne, Hibru lokke iyyie, Judia lokke amie. Ayonlok luyém ngo Pharisi amie.

⁶ Delokke ngo nesurunge ikaane ngo mondoliem irééto. Ayonlok yéjii namem emmílo, ngokke imem atí kamangai.

⁷ Idakkom ngokke paapekpe míínamdem supak ngo Kristoke legape asampe míídungku.

⁸ Dem petommang; takamem supak arekanarung ngokke ruutum Jisu Kristoke legape asampe míídungku; bíkke legape ngo atí takamem asampe mepaksuto. Kristome paado kupe emla dekedem ngo yaapakna atípe míngkaku,

⁹ delokke bíkkíng apíípe leko bosudungku. Ayonem igekolok paanam kísape yéjiinamde Kristokíng míngke sukolok Shédí kelok lenne.

¹⁰ Kristome ngo kénlídung delokke bíkke gerep kunam pauarem delokke bíkkelo adírbosu penamem, bíkke kísape silíídung

¹¹ delokke dekepe, depe epekom sinamlokke gerep kunamem paalídung.

Píílík Pekolo Dukbom Suname

¹² Sikesim ngo paayin tobong emsumang, demangkom ngo apíng kabong emmang; idakkom Kristo Jisuke ngom gaklík bomnam aman demmin paadorupe emla ngo itídune.

¹³ Bíro kídía, ngo aropakpe posudung, ngo aman paape namem paayinto emmang. Idakkom agom atelko ngokke kadung. De idung yérugem mitpan sukunam delokke yépenam legape ralbom namde.

¹⁴ Shédíke ngom tomlíknam teyong amolo Kristo Jisukíng aman paapeko bedangem ngo raltí bomdung.

¹⁵ Aidlok kénbee suna ngolu takam sikena mííbomnam kape aido. Delokke ayokon agomlo nolu angupe míídokom, demkom Shédí bí nolum berokbiyé.

¹⁶ Depe epe idakkom supaklope ngolu ingkona niyomlok yétodí delok ngolu endan tetelaju.

¹⁷ Bíro kídía, ngom kanggesula yéna kídílo leko bosutoka, delokke ngoluke niyom lengkan binamlok yénem kangítoka.

¹⁸ Legade, kerape ngokke leko leko nolum pobinam kísape supakteng miksi bíddola podung, deddína amie Kristoke kross em mirupe ila yédung.

¹⁹ Buluke gípekode nyokpekue, buluke pílenmana shédíe buluke akiisue, delokke bottena amínde buluke annyii supekue. Buluke aapíde tani among sokke eku séralo dung.

²⁰ Idakkom ngoluke membor amín gepekode teyong amolo dung. Telok angkupena, turmona Ruutum Jisu Kristome ngolu erappe toyala dung.

²¹ Bí ngoluke tolmana amíl kídí sim angupe iyéku delokke takam atíem bíkke gooralo meku nana pauarlok amíl kídíem bíkke agíke angun ralna amíl kísape iyéku.