PHILIPIA 2 - DEENA BAIBÉL (BSI)

Kristoke Remaknam Delokke Bottenam

¹ Kristokíng leko bosu namlok nolu ernam paadumílo, bíkke ayanglok nolu mííte sunamko kadumílo, remelnam delokke ayang míípang sunamko kadumílo,

² demílo aapíem atelpe gedola, ayang atelem bomdola, mííbom ibom namem aid atellok gebo sudola ngokke írgang ashéngem apíí motoka.

³ Agí legang míídolok demangkom are kamana adum ale adonglok agérem ibo sumapeka, idakkom mínggíp sudola akonem agíem aiyanakope míílangka.

⁴ Nolu mipile agí mííbanam petomem kaamape, idakla abíd kídíke mííba namemteng kaabo sulangka.

⁵ Nokke míídonge Kristo Jisuke míínam kísape míílangka;

⁶ bí agínpe Shédíke séguem gesu dungai, idakkom bí atíkon kísape Shédíme akampe singkí sutope emla imang.

⁷ Dempenem agísuem tarong kamana kísa, béérang séguem gela, tani kísape aato.

⁸ Delokke tani kísarupe lengkansula, bí agísuem améngope mesuto delokke sidolope donggap geto. Krosslote sigeto!

⁹ Delok legape Shédí bí bím kedon yalumna amolo bomonto delokke takam teyolo kedon yalum nape duupena amínem gemoto.

¹⁰ Delokke dekepe ila Jisuke amínem mínggedola, teyong telokke, amosokke delokke among rumkíng lokke turkína takame bíkke lebíng rumkílo kumsuyé;

¹¹ delokke takame bíkke lebíng rumkílo Abu Shédíke ralnamem yidgedola Jisu Kristo Ruutume emla pue suyi mape pogoosuyé.

Tani Amongem Angunpe Latbooname

¹² Delok legape ngokke ayanam angong kídía, ngokke kangko petom lomang, idakla ngokke kaamang kolo mirííyape tatge igedunade noluke turnam legape pesuem dan gedola agérem gérdan teteng langka.

¹³ Kapeila Shédí bí bík agéremlang míínamem ilíídope emla agínpe nolukíng duumíndung.

¹⁴ Takamem lukí pokí, lutek manrek bosumape ibosulangka,

¹⁵ delomin nolu lupe géépenam kamape deenampe, Shédíke ome-oo aro kísape imem kamape atímana tani among delokke paab kana tani gooralo deenampe yéyéne. Buluke aralo no taleng telokke takar angun kísape berokpe angun boperung aido,

¹⁶ turmona agomem nolu bidola angun bonape ipe aido. Nolu dekepe imílomin Kristoke Longelo ngokke nolum bottepe mííyum sukengko kayéne; kapeila de ngoluke ingéé sunam agére emmumpe nyokmayé delokke dem lengkanyé.

¹⁷ Míngkí suname ngokke turmona iyyiem noluke míngkelok Shédíme bimansupe emla runggulo bítkat madokom, ngo ashédung delokke ashéngem nolum takam shébo sudung.

¹⁸ Dekepe nolute ngokkíng ashéng bosupe delokke írga bosupe aido.

Timothi Delokke Epaphrodit

¹⁹ Ngom noluke aipe yamríknam koborem paape emla Timothime menape nolukelo melík domílo emla Ruutum Jisukíng míínam sudung.

²⁰ Bíkke kékonlo sékoteng noluke ainam legape aropakpe agér itope emla erap bomna kamang.

²¹ Mipile Jisu Kristoke legangem míímape, agí legang petomem míírí sudung.

²² Idakkom Timothime ainako embomnam dem nolukom kéndung, bí ue abuem inam kísape ngom ngiitom tatpona agérlo igulto.

²³ Delok legape ngok ai-asang akorem kaasu bomdola nolukíng menape bím melíkdope emla mííbom sudung.

²⁴ Delokrongem ngo agíe menape aadope emla Ruutumkíng míídíísudung.

²⁵ Idakkom ngokke pííramem kaabo sudope emla noluke melíknam noluke makro, ngokke bíro, ngokke gértíng delokke sipaying angong Epaphrodit me nolukíng melat kubape iyépe emla ngo míídung.

²⁶ Legade nolu bíkke kinamem tatto emnamdem tatla bí nolum míítíla delokke ankí kítíla dung.

²⁷ Arope bí kito, delokke sibom dagai. Idakkom Shédí bí bím yaasamem bito, delokke bím petommang, ngomteng duuk teyolo duuge ipelo emla bito.

²⁸ Delok legape nolu bím kaarík sulangka nolu ashébosu dokupe delokke de ngokke aapíemte esaa modokupe ngo bím melík língkue idung.

²⁹ Bím ruutumkelo ashébola írgape torík bosulangka,

³⁰ kapeila noluke ngom ilang bimanam igul legape sipe nyokpe namem ankí yimape, Kristoke agér legape bí sita turta bomsuto.