PHILEMON 1 - DEENA BAIBÉL (BSI)

¹ Kristo kepe patek duubina Paul, delokke ngoluke bíro Timothi kelok, Ngoluke ayanam Philemon delokke gérpé loope,

² delokke ngoluke bírme Apphia delokke ngoluke sipaying angong Arkipa kílang nokke ekumlo duudum suna mondolilo salame.

³ Ngoluke Abu Shédí delokke Ruutum Jisu Kristoke yanggong elang yéponame nolukíng duudak langka.

Philemonke Ayange Delokke Míngkenge

⁴ Ngokke kumsukolo nom míípang ayarsula ngokke Shédíme koyitdung,

⁵ kapeila nokke Ruutum Jisume míngke sunamem delokke Shédíke amikídíem ayanamem ngo tatdung.

⁶ Ngoluke Kristo kelo aina tatkén kangkén namem no paadope nokke míngkeng tarongem aabanpe orsudope ngo kumdung.

⁷ Ayabosunam bírua, nok ayange ngom botterupe ashé motung delokke ermotung, kapeila no Shédíke amikídí aapí ainangem rengam motung.

Onesimke Legape Roguname

⁸ Delok legape, Kristokíng ngo miramdola nokke ipenamem poyil dungkom,

⁹ ngo nom ayalokmin rogudune. Mijiipe idola delokke supaklope Kristo Jisuke pateklo duuduna Paul ngo

¹⁰ ngokke pateklo duudungem ngokke oope itona ngokke oo Onesim kepe nom ngo rogudung.

¹¹ Kerape bí nokkepe atí agérlo aamangai, idakla supak bí ngonyike legape agér bidung.

¹² Ngokke aapí ainang adumpe bím nokkíng melat líkdungku.

¹³ Ngiitom tatpona legape ngokke pateklo so duudungem, nokke adumpe ngom bí iguldope, bím ngo ngokkeso mela dungai.

¹⁴ Depe idakkom no ngom igul ruyépe emla ngo lugap lamang; igeyéla no agíke míísatlok dem isuyépe emla ngo míídung. Depe ila no tolíkmape ngo atí imayé.

¹⁵ Míngkíname bím nokke lokke anyongoko langgé pongku namde yénam tabuulo no bím duubo sudokupe emla itunape.

¹⁶ Delokke supak bí abíl moomem yimang, idola abíl empenem aiyadung; bí Kristokíng míngkesuna ayanam bíroko. Bí ngokkepe ayanamko, nokke perange tani isap pelang Ruutumkelo bíro kísape ayang penamko.

¹⁷ Depe iname no ngom yébosuna angoope míídumílo, ngom yamríknam kísape bím yamrík langka.

¹⁸ Bí nom imemko itung míloteng demangkom nokkíng ajéngko kadumílo, ngom eget dem melík langka.

¹⁹ Ngo Paul agí, ngokke agí alaglok sim atsudung. Ngo nom biyéku. No agíe ngokke gooralo dung emnamdem meto bongka.

²⁰ Demílo ngok bírua, Shédíke amínpe sim ngokkepe ibika. Kristo kelo bírope idola ngom míípo moyika.

²¹ Ngo nokkíng atdung; ngokke lulík namemteng pakyape no iyépe emla kénsudola, nokke belengem míídíílíkdung.

²² Delokrongem agom konko; mibo dungkeng ruumko ngokke legape iruutoka, kapeila noluke kumgap bomkolok ngom nolukíng melen yékupe emla ngo míídung.

Méélam Yalum Salame

²³ Kristo Jisukepe ngokke patek duupéé, Epaphra bí nom salamem bidung.

²⁴ Delokke dekepe, Mark, Aristark, Dema delokke Luk, ngokke gértíng kídíe salamem bidung.

²⁵ Ruutum Jisu Kristoke yanggonge nokke aidlo duumín geyépe.