NGIITOM SIRUNG 9 - DEENA BAIBÉL (BSI)

Gyanelang Bopole

¹ Gyane gaang kínít kolok bíkke ekumko moto.

² Bí simonko pala onggur apongem lang arí namponem soyél sula aranko dodope ito.

³ Bí bíkke mime béérang kídíem, taonlokke kedon yalumna amolokke amiem gokdope melíkto:

⁴ “Kénmana amikídíe aalangka!” Delokke mide amiem bí poto:

⁵ “Aala ngokke aranem dolangka, delokke ngokke iyél sunam onggur apongem tíílangka.

⁶ Kénmana ami kídídem yébosumape yélangka. Kénnam bedangem matalangka.”

⁷ Loorímana amiem lusi lumomílo, no lupu luyé kosuyéku. Atímana amiem lurat porat mílo no míínying kosuyé.

⁸ Yidkím suna amiem edílokom lusi lumope aimang, delok legape nom bí akyé. Idola no míípe míngorsuna amiem lurat porat mílo bí nom mínggeyé.

⁹ Nokke ponamlok bí míímo suyéku. Nokke ponamde deenampe yéna amiem kéntem sumodung.

¹⁰ Gyankana amipe ipeke no, kerape Ruutum me mínggappe aido. No Deena Atelme kéndu mílo no tatkén ladung.

¹¹ Gyande nokke yépenamem bodong modung.

¹² Gyan kamílo no paabanyé, delokke dem mepak sumílo nomin asam suyéne.

¹³ Bopol si agom petome, atí kénmang, delokke annying kamana mime ane kísa dung.

¹⁴ Bí agí ekum yablelo duudung, demangkom taon lokke kedon yalumko dungkolo duudung.

¹⁵ Delokke agí agí agérem mííbom sula dakna kídíem goktola gokdung:

¹⁶ “Kénmana ami kídía aatola!” Mide amiem bí podung:

¹⁷ “Pyoonam aside tíípoyadung. Pyoonam dotkéde ngamyadung.”

¹⁸ Sotnam ami kídí de, bíkke ekumlo gínade sidung emla kénsumang, delo bíkke ekum delo aalup líknade, tani among sikolo olup líkdubong.