NGIITOM SIRUNG 31 - DEENA BAIBÉL (BSI)

Rojem Luyilname

¹ Si sépekna agomkídí si Lemuel Rojake anelokke bím poname:

² “No ngokke ayanam ue, ngokke kumnamem tatbiname. Ngo ingkoko nom popene.

³ Nokke tolnamem, delokke murkongem abír ikolo pityin sumapeka; bulu rojakídíem inyokto.

⁴ Tatgap langka, Lemuel. Roja kídíe apong tíípe aimang, demangkom potígem míítíbompe aimang.

⁵ Bulu tííyém ayonem kénsuyimang, delokke mimang opan yégangem kénbiyimang.

⁶ Potíkde sidakna amikídíke legapemin, míídír míísona ami legapemin.

⁷ Bulum tíímotoka, delokke buluke mimang opanem duuk kenoem mitpan sumotoka.

⁸ “Agíe polasumana ami kídíkepe pobilangka. Atung arééna ami kídíke yégangem kaasing langka.

⁹ Bulukepe pobilangka, delokke arolok kebang lubonape ilangka. Aatí opan kídíke legangem mosiilangka.”

Ardana Ménge

¹⁰ Ardana méng paanamde paalang manamko! Bí dokpunemte bojéyangko are kayane.

¹¹ Bíkke miloe bím edíípe míílíkdung, bí edílote opanmayé.

¹² Bíkke turdung tetengem, bí miloem aidope idung, delokke edílokom atímape imang.

¹³ Bí muja pola, ege sumla ngiipén kamang.

¹⁴ Pesikoret ina lokke jajie inam kísape, bí rego regolok ekumlo dopenamem bomang bodoku.

¹⁵ Bí bíkke mime béérangem kape ipe aidodí dem pope emla, delokke erang legape dotké tííbe ibope emla doonyi saamangadape rokompe gerepdo.

¹⁶ Bí amongem kaala redo, delokke bíkke murkong paanamlok bí onggur arígem ido.

¹⁷ Bí ngiinarungko, ralnako, delokke miríínako.

¹⁸ Bíkke ilennam atí takam lokke arem bí kénsudo, delokke yoh loope agér ido.

¹⁹ Bí agí alaglok ennoem mosudo, delokke agíke gepenam egem sumsudo.

²⁰ Bí mimang opan kídíem bipenamem bidardo.

²¹ Tapam odolokom bí míídír sumang, kapeila bíkke erange iigana ege galuk gepename kadung.

²² Bí ketpu egem sumsudo, delokke yalíng yamukna gaina silik kísana egem gedo.

²³ Bíkke milode amín kadung, membor ruutum akone.

²⁴ Bí ege kídíemlang uug kídíem sumla, dekedem pesikoret inalo kolíkdo.

²⁵ Bí ardadung, delokke míngge kosudung, méélam kerang yépenamem pesomang.

²⁶ Bí aina agomlok remelpe podo.

²⁷ Bí moomang ayardo, delokke ekum erang pííram sémuem kaado.

²⁸ Bíkke ome-ue bím mííyumsudo, delokke bíkke miloe bím koyiddo.

²⁹ Bí podo, “Mimekídíe bojéko aina méngpe ido, idakkom buluke aralok no aiyalumne.”

³⁰ Kampode yaddung, delokke kaabade nyokdoku, idakkom Ruutum bím mínggena mimede yidpename.

³¹ Sok agér takamsok legape amínem bím bilangka. Bí takam lok mínggenamem paabane.