NGIITOM SIRUNG 28 - DEENA BAIBÉL (BSI)

¹ Mirul ami kídíe monbomna kamapete duggedoku, idakkom tetena amide myomur kísa dungkasudo.

² Paab ina opínde, ruutum komílo ruutum kodada itído. Idola míípe míngorna, delokke kénna yégebona kako opínde edíído, delokke duuyardo.

³ Ruutumpe yéna amipe idola opan amiem iréénade, ali ayéem inyokna pedong dodíng kísane.

⁴ No ayonem míngge mamílo mirul amikepe yédung, idakkom no dem pesomílo bulukepe imang.

⁵ Atímana ami kídíe ingkue jonna ayone dem kénmang, idakkom Ruutum bím kumsuna kídíe dem aipe kéndung.

⁶ Miremdola tetemana dempemílo, opandola tetenamde aiyadung.

⁷ Ayonem pesona yaaméde kénna amie. Séko ainam legape angong imadudí de agí abuem annying modung.

⁸ No apek laala miremla amiem míílo dumílo, nokke ekurade opanem ayana akonlo gíyé.

⁹ No ayonem peso mamílo, Shédí bí nokke kumnamem tatkirupe tatyé.

¹⁰ No tetena ami konem atímanam agérlo yadlíkmílo, no agí etkulo batkosuyé. Deesuna amiem aman biyéku.

¹¹ Mirem ami kídíe agínpe agíem kénna kísape míísudung, idakkom aapíem kangkénna opan amide aiyape kéndung.

¹² Edílo aina amikídíe ruutum bonape iyédí, takame domando, idakkom atímana ami kídíe ruutum bompe aayém, ami kídíe rugedo.

¹³ No nokke paabem mesiimílo, edílote yénamlo ikumla yélamayé. Dekedem ponkan sulangka, delokke mepak tokuka; delomin Shédí bí nom yaasamem lengkanyéne.

¹⁴ Agínpe Ruutum me pesolangka, delo no ashéyé. Eda aapí gemílo, no nyokyé.

¹⁵ Opan ami kídíe kaníína ruutumem atí iyan sulamang; bí ukna myomur kísape, demangkom situm uknam kísape nanyiidung.

¹⁶ Among ruutumde aipe míípe míngorsuna tanipe imamílo, kaníína ruutumpe iyé. Séko jonmanem akdudí bí oolrungko ruutum bomyé.

¹⁷ Ami petkolok ajéng genade menang asak agí ago arungem koorusunam akame. Bím itumpete imapeka.

¹⁸ Tetelangka delo no dengompe yéyé. No tetepe yémamílo, menang asak oletyé.

¹⁹ Ankípe arík ina amide dopename alum sumang. Idíem yényokna amide agínpe opanyé.

²⁰ Tetena amie kiidaryé, kanampe ashéla duuyé. Idakkom no menang asak mirempe imílo no ingéékosuyé.

²¹ Míngu ingude imeme. Idakkom ayokon kebang amie ansoona bisup aman panggalok bisarem menamlok idung.

²² Mikit amikídíde menang asak remlídung, delokke edílo tong aryange aabomyédí dem bulu kénsumang.

²³ Ayokon amiem lujon ijonlangka, delo méélamlo bí yidlíknam empemílo dem aiyape mííyumsuyé.

²⁴ Ane abulok pyoosunamde pyoonyomang emla míína amide, doppyong aro akame.

²⁵ Mikitnamde ebín lerínge. No Ruutum me míída sunamde aiyado.

²⁶ Nokke agíke míídulok gínamde mide agére. Edíílangka. Gyankana amikídíke luyilem matalangka.

²⁷ Mimang opanem bisulangka, delo no pííram samomayé. No opan amiem kaasumape imílo, amie bojéko nom bééyé.

²⁸ Atímana amie ruutumpe imílo amikídíe rugedo. Idakkom edílo bulu ruutum lokke olet yékudí, aang gejiina ami kídíe ruutum boyéku.