NGIITOM SIRUNG 26 - DEENA BAIBÉL (BSI)

¹ Midem koyitname díyu raadalok tapam, delokke dígín doosan lok pedong kísadung.

² No paaperusunape imamílo, béénam rolnamde nom atí ilang mayé. Bulu uadí kayimape yoptígoona pettang kísadung.

³ No guréem demlíkpe aidung, no gadoem lagamlok sotumpe aidung, delokke no midem dempe aidung.

⁴ No íípe íílenamem luyan sumílo, no dekepe íngkína amidelok kísapakpe idung.

⁵ Íípe íílenam agomem pope pole yansulangka, delo de dekepe íngkínade bíkke míínam kísape amisi míímanako emla kénsuyéku.

⁶ No mide somoem kobor bimomílo, de agí alem teetung sunam kísape iyé; no ebínem kolík sudung.

⁷ Mide somoe ngiilung tungkínamde lebééne gíkísupe emla inam kísadung.

⁸ Atí kénmanem yidnamde, elíngem bonna roborlo éélíknam akame.

⁹ Mide somoe gyan ngiitomem pokínamde, tíngírsuna amie agí alaglok taangem atbínsupe inam kísadung.

¹⁰ Agér bina ruutume mide somoem ríkrap tomnamde, mipilem duuk ipaalíkdung.

¹¹ Mide somoe loorí mana atíem lennyinape ikunamde, ekiiye agí abatlo lennyinape gílat sukunam kísadung.

¹² Kénmamumpe kénnape míísuna dempemílo, mide dekyakde aiyadung.

¹³ Kapeila ríksona amie ekum lokke gílenmane? Bíkke pesonamde ingkokodí? Myomur kua pesobom dune?

¹⁴ Loobakna amie ippulo kettído. Bí lamgé rulbungem korbolímang.

¹⁵ Ayokon loobakna amie buluke donam emte nappalo tumlík duamang emla míídung.

¹⁶ Ríksona amide, bí lugíílok luyil lana midum kínít empemílo kényadung, emla míísudung.

¹⁷ Akmín sugímape akmín sukolo yénamde, bedalo gíla ekiiem nyorulok gakna akame.

^18-19 Akonem isi-sio bipala ngo iman tuanamin emkuna amide, tumna amie petnana ekuralok imannam kísadung.

²⁰ Esing kamamílo eme middo; luge mamílo lumín sumayé.

²¹ Mekole metungem írmodo, esinge emem dormodo, delokke ebínbona amie akkí lukíem kayarmodo.

²² Lugesi tatname tatbarunge! Edítko ngolu dem tatbape taddune!

²³ Nokke míínam aroem dengepe lupo sumanam agomde, kédéng pekilo arem pítak sunam kísadung.

²⁴ Aromana amie alíngem gesup sugeyéla, yidnam agomlok pokomdung.

²⁵ Bulu tatpope polado, idola bím arope míímapeka, kapeila bíkke aapíde nenam mílípe idung.

²⁶ Bíkke míngkinamem bí kangkimana kísape irudung, idakkom takame bík atímape inam atíem kaayé.

²⁷ Akonem, batdope emla etku gona kídíde, agíem batko suyéku. Erak rakna amie agíem bénlum kosudoku.

²⁸ Luakrupe luna taniem no ansulangka. Yadduk líknam agomde nyokmodung.