NGIITOM SIRUNG 23 - DEENA BAIBÉL (BSI)

¹ No bottena amiem dobosupe emla dungayém, bí kapena ami kodí dem aapílo getoka.

² No kenoe séngé dokom mén gelangka,

³ Bíkke binam dotkéde dopodo emla doboo sumapeka; bí nom iperung emlangkom ilado.

⁴ Miremdope emla yagope ankípe ngiimapeka. Katengem kasupenamem kénsulangka.

⁵ Míyae deenyoknam kísape, nokke murkonge kemír atellok gíyé.

⁶ Bigoddola bina amilokke dotkéyem domapeka, demangkom bíkke binam pimsing apimem doban sumapeka.

⁷ “Sah anyongkote dotemtola,” emdokom, bí arorupe mííla pomang. Bíkke mannamde amide kapenakodí dem míílamin podune.

⁸ No nokke donamem abatpe batlen suyéku, delo nom yidlík namde emmumpe nyokyéku.

⁹ Moyéknam aro agomem midelo pomapeka, bí dem tatge sigemayé.

¹⁰ Rísu lípang akuem puubín mapeka, demangkom aatí opan kídíke yébomnam amongem langkam mapeka.

¹¹ Ruutum bí bulum tolnamrupe aabosudung, delokke bí bulukepe nom akpésula poyé.

¹² Nom luyilnem no tatgap langka, delokke edítko paklayédí no kénpe emla míílangka.

¹³ Kooem ijon gode emla míímapeka. Pitek pirekde bím petmayé.

¹⁴ Dekepe ikolok bíkke yépenamem mosiiyé.

¹⁵ Ue, no milo aromílo ngo ashérunge iyé.

¹⁶ Nokke gyanlok ponam agomem tatla ngo mííyumsuyé.

¹⁷ Paabgena ami kídíem nemapeka; Ruutum me peso genamem nokke yénamlo ankíbomlangka.

¹⁸ Depe imílo nokke yépename angun abungyé.

¹⁹ Tatgaplangka oo sakkenga, milo arolangka, nokke yénamem aipakpe míngíí sulangka.

²⁰ Donam tíínam mílípe kumtensula duuna, demangkom tíngír dobatsula yéna ami kídílo yébosumapeka.

²¹ Tíngírsula yéna kídíem, delokke domon tíímonna kídíem, tong aryang moyéku. Nokke beleyé takamem donam elang ipnam mílípe imílo, no menang asak ingínsuyé.

²² Nokke abu agomem tatgap langka; bí mangamílo noko kamayai. Nokke ane eejoyém, ayangem lengkantoka.

²³ Aro, gyan, tatyilsunam, delokke aina míínam, sikesi rebom supename, idola sikesi nok kope maname.

²⁴ Aang gejiina amilok abude ashéng sénggíngko kadung. Gyankana uem no mííyum sulado.

²⁵ Nokke ane abuem mííyum sumolangka; nome olennem ashémolangka.

²⁶ Ue tadíítola, delokke ngokke yénamlok no kaayil sulangka.

²⁷ Notii elang deemana mime kídíde batpena etku kísane.

²⁸ Bulu dokait kísape nom tobomdung, delokke amiem bojéko míngke sumoyimang.

²⁹ Apong tíítanako, tíngír dobatsupe erap lennako, ngom lengkantola, delo ngo duuk adíre, delokke agíem mínggíp sunako, agínpe ebín monako, delokke lutek lurek bona amiko lengkanyé.

³⁰ Bík amige iyyi kísa líídung, delokke ipe mangkolok iyak isakla rígéye kadung.

³¹ Yalí líísi tíípo kaalíge ila batilo duuna, tíílík suyém remel bobel ipena apongem no inom kosumapeka.

³² Ruem no gerepla asum aarkana tabí reknam kísa depnamem ansuyé.

³³ Nokke amige kaanyinge iyé, nok aapíete berokmape ila, delokke agomemte berokpe polamayé.

³⁴ No aane siyéng raadalo duula dungkan ikanmang, sigír teyolok etkung yutnam kísa iyé.

³⁵ “Ngom kíttonapekulo, ngom demnako katorunam pekulo, idokom ngo kénsumang. Ngo kapei gerep lamape idune? Ngo akoda tíítem sulídung,” emla no míísuyé.