NGIITOM SIRUNG 2 - DEENA BAIBÉL (BSI)

Gyanke Amane

¹ Ngokke luyil namem kénlangka ngokke ua, delokke ngokke nom ilangka emnamem edílote mitpan sumapeka.

² Gyanem tatgap langka, delokke dem tatkénpe míílangka.

³ Kénnamem kolangka, agom gomroem mabom langka.

⁴ Arem tadogem, demangkom paapenam murkongem ankípe matanam akampe sim mata langka.

⁵ No depe imílo, Ruutum me pesogenam lokke legangem kényé, delokke Shédíke legang kénnamem paayé.

⁶ Ruutum bímin gyanem binade; bíkke lokmin kénnam paanam elang tatkénname lendune.

⁷ Bí igulem bidung, delokke yéjina ami emlang jonna ami kídíem kaabomdung.

⁸ Amiem tetelok aipe inem iguldung, delokke bíkkíng mínggapnem kaabomdung.

⁹ No ngok agomem tatgapmílo, arona tetena, delokke aina atíem kényé. Ingkuedí ibaanampe idudí dem no kényé.

¹⁰ No gyankana amipe iyé, delokke nokke kénname nom erapmoyé.

¹¹ Nokke kénnamde, delokke tatkénde nom mopítsuyé,

¹² delokke nom imem kolokke itumyé. Ami poku podíng kolok ebín lenpenam lokke sikesi nom megenyé.

¹³ Yéjinam bedangem mepaksula, paabke kaamo aralo duuna aralote,

¹⁴ imem agérem ashépe míína, delokke atímana agérem mínge sumape ina kídílokke,

¹⁵ bíírík mana ami kídí lokke mootemoyé.

¹⁶ Amiem lunom ponomsula abír ikosulína mimem no itum sulayé,

¹⁷ dekepe ina mimede agí miloem aro míímape, iigang aapíem mitpan sukune.

¹⁸ No bíkke ekumlo gímílo, nyokpeko bedalok gídung. Delo gínamde tani among sokke nyokpe kolo gíname.

¹⁹ Bíkkíng gímem sunade nyokyar líkdung. Bí turpeko bedalo lenyikumang.

²⁰ Delok legape no aina amikídíem kangge sulangka, delokke deenampe yélangka.

²¹ Yéjiina ami kídíde lekobone, de ngoluke amoso duuyé.

²² Idakkom Shédí bí atímana amiem sok amo sokke sopak yéku, delokke ííng kísape paabna kídíem amo sokke bupak yéku.