NGIITOM SIRUNG 17 - DEENA BAIBÉL (BSI)

¹ Ebínko ekumlo aran donam dempemílo, dengompe ereena roti aborko donamde aiyado.

² Mííjina béérange ruutum lokke loorímana uem mííbo kénbodung, delokke ruutum tarongem paamín gedung.

³ Uun emlang baldínem emelo romkaado, delokke tanike aapíem Ruutum bí ikaado.

⁴ Atímana amie atímana agomem tallído, delokke menakídíe menam agomem tallído.

⁵ No aatí opanem ngilka mílo, de bulum pílenna Shédíem ngilkaaname. Akonke gérmangem ashébommílo nom ingééyé.

⁶ Oo kídíe agí abulo mííte sunam kísape mijing kídíe buluke oten ome-oo kídílo mííte sudung.

⁷ Mínggenam amie menam lumang, delokke mide yaoe arekana agom popenam kamang.

⁸ Ami ayokone bisup laasup agérdem paajing ijiirupe míísudung; bulu sim atí tabungem inaladung emla míídung.

⁹ No amiem mííbang kosulídumílo buluke nom imemnamem mesam langka. Imemem mííyar genamde, angong arum, sonsu yonsuem inyokdung.

¹⁰ Mide amiem demrum língkoko dembomdola kénmonam dem pemílo milo aroe gomké atellok kénpooyadung.

¹¹ Ebínem igukbona mirul amikídílo siname migusuak kotoki kísape aabomyé.

¹² Mide yao amie loorí mana agérlo moomadungem ríksu namdem pelíngem, ngangem laabínnam situm ane miganako ríksuete aiyang.

¹³ No ainem atímalok iyan sukumílo, nokke ekumlo atímane duuyar líkyé.

¹⁴ Akngun mínsude asi patum namem kerayalumpe bényanam kísadung; dem bojé mangadape melangka.

¹⁵ Deesuna taniem lukaanamde, demangkom mirul amiem mesam líknamde annyi dekai Ruutumke kangkinampe idung.

¹⁶ Mide yaodem murkong pillíkla porikolo melíknamde are kamang, kapeila bíkke kénpenam demte bí kénmang.

¹⁷ Angong kídíde agínpe agí agí ayangem lengkandung. Duuk adírem kaabo sumana bíro kídíde ingkuedí?

¹⁸ Atí kénsumana tani petom emin akonke ajéngem dorbipe emla togebidune.

¹⁹ Paabem míínamde ebínem mííname. Borope míísu ayarmílo, no ebínem tomlík sudung.

²⁰ Séko atímanem mííla, delokke pola idudí, de aina atíem míínam sulamang, nanying petomem paayé.

²¹ Loorímana agérem ina oo lokke abude duuk adír mílípe idung.

²² Míípola yénamde nom eker etsamodung. Adír ayarnamde nayi nayipe sinam kísadung.

²³ Loorímape bisarna amide asoope bisup namem laadung, delokke tetengem imang.

²⁴ Minyo amide aina agérem mííjin bomsudung, idakkom midede ipe sile mílílok irepdung.

²⁵ Loorímana ue agí abuem buumodung, delokke anem míídír modung.

²⁶ Deesuna taniem ajéng dormonamde imeme; aina amiem ingéénamde teteng ayonem ipat sudung.

²⁷ Kénna amie agomem ansula podung. Dengomna amide aro aapíem gene.

²⁸ Depe iduakom edíloope loorímana amie asoope, delokke ngommape duuyedí, deloope bím kénnako delokke minyonako emla míílado.