NGIITOM SIRUNG 12 - DEENA BAIBÉL (BSI)

¹ Séko kénnamem ayadudí, agíke imemduem poyil kosulídung. Lusi lumuem aknade atíkote kénmane.

² Ruutum bí aina ami kídíem ashédung, idola atímape ipe emla míína kídíem akdung.

³ Atímana agérde míída sukeng bimang, idola yéjina ami kídíde edíípe duudung.

⁴ Aina méngde miloke mííyum sukenge, delokke ashéng séngkenge, idakkom agí miluem annying mona méngde longkin aralo kénsar kinam kísadung.

⁵ Tetena ami kídíde nom ailok iyé, mirusogode nom yadnam petomem mííbomdung.

⁶ Loorímana ami kídíke agomde mokana kísadung, idakkom yéjina ami kídíke agomde irítna amiem mopítdung.

⁷ Atímana amie agí agíe nyokpenamem ipaasudung, delokke otíng oyin kamang, idola aang gejiina kídílokke edung erange dunggepene kadung.

⁸ No míídu-míngonsuna amikomílo, nom koyidyé; no atí kénmana komílo, amie nom mííloyé.

⁹ Bottepe míísudola kenola yépenamdem pemílo, dolík tíílíksula yéna moomem amipe yénamde aiyane.

¹⁰ Aina amie agíke bomnam simonem aipe kaasidung; idola atímana ami kídíde bulum mogírdung.

¹¹ Ríklína amide dolummape paadung, idola are kamana agérlo itínamde bopol agére.

¹² Mirul amikídíde atímape ipenam agérlo mííta tatídung, idakkom aang gejiina kídíde edíípe duudung.

¹³ Mirul amikídíde agí agomlok batkosudung, idakkom tetena amide agíem ebínlokke ngétton sudung.

¹⁴ Nokke aman paapenamde nokke agom pokorlok lang agér ikorlok idung; no nokke paaba namem paayé.

¹⁵ Atí kamana kídíe agínpe agí mííduem aroyape míísudung, dem aidung emla míísudung. Gyankana kídíde luyilem tatgapdung.

¹⁶ Mide amie marlíyém, menang asak amiem kénkosudung. Míípe míngorsuna tanie lukangem tatpakdung.

¹⁷ No aroem podumílo tetengem idung, idola mename berulok gíbodung.

¹⁸ Míngíímape ponam agome yoksalok panam tarí kísadung; idola mííjina ponam agomde ipíladung.

¹⁹ Mename duutemang, igeyéla aroe agínpe turyardung.

²⁰ Atímape míírí míínyona kídíde eduk edak isémdung, idakkom ainam legape agér ina kídíde ashénamem paayé.

²¹ Aang gejiina kídíde atímape ipeko kamang, idola mirul kídíde ebín petomem paadung.

²² Ruutum bí mena yadnem akdung, idola agí agomem bomgapnem ashédung.

²³ Míípe míngorna amikídíe buluke kénnamem asoope donggedung, idakla bopol amikídíe agíke kénmangem lengkan sugodung.

²⁴ Mirínge nolum ralnamem bidung; loobakde nolum abílpe imodung.

²⁵ Míítíname nokke ashéngem laabíndung, idakkom remakna agom kídare nom essamodung.

²⁶ Aang gejiina amide bíkke angonglok kaayil sukepe idung, idola atímana amie bulum gínyok bodung.

²⁷ No loobakmílo nokke míítí bomnamem edílokom paamayé, idola no erbommílo, no aina atíem paayé.

²⁸ Deenampe yénamde turnamke bedange; mirulnamde sipeko bedange.