NGIITOM SIRUNG 11 - DEENA BAIBÉL (BSI)

¹ Ruutum bí yadnamlok bekkínamem kangkidung. Bí tetelok kínamem ashédung.

² Adum-ale míísuna ami kídíem bí menape annying modungku. Tetelok yénamde gyanke agére.

³ No aidumílo nom tetenge yébodung. Míída sukan manam ami kídíe agíke miru-sogong agérlok nyok sudung.

⁴ Nokke sidí longelo kanam remname nom aina agér ibimayé, idakkom teteng arode nokke turnamem mosiilado.

⁵ Aina among lokke yénamem tetenge yépo moyadung, idola atímana amide agíke nyokpekuem langa sudung.

⁶ Yéjiname tetena amiem mosiido, idakkom míída sukeng kanmanam amide agí kaabolok inyok sudung.

⁷ Mirul amie siyém bíkke mííbomnam dete bíkkíng simín gedung. Miremlo míídíí sunam dete atí are kayimang.

⁸ Deenampe yéna kídídem adír lokke mosiidung; de atímana amilo aalatdung.

⁹ Shédí kamana ami agomlok nolum nyokmo ladung, idola deenampe yénake kénnamde nom mopítlado.

¹⁰ Tetena ami kídíe aina atoko poyémílo, doolunge ashédo, delokke atímana ami kídíe simílo ashénge séngédung.

¹¹ Deenampe yéna ami kídíke lubéélíkko doolude bottedo; idola loorímana ami kídíke agome doolungem nyokmodung.

¹² Amiem kenyékrupe lunamde mide agome. Idola no kénsu dumílo, míísisula duuyé.

¹³ Gomon pogena amidem sékote arang agomem pobisutope emla míída sukanmang, idakkom míídíínam amidem no míídasulado.

¹⁴ Yébona kamamílo opínde nyokyé. Luyil poyilna bojékode edíngkue.

¹⁵ Kangkénmanam ami lokke ajéngem dorbipe emla toge sumílo, no bursuyéku. No delo imín gemang namde aiyadung.

¹⁶ Ayana mimem mínggedo, idakkom akor kamana mimem mínggemang. Ríksona amide abal kamayé, idola takamem mííjina amide remyé.

¹⁷ Nokke ayala inamde agíem ibaasudung, no kaníímílo agíem ibulsudung.

¹⁸ Mirul ami kídíde depekom atí paamang, idola no ainem imílo, aropakpe nom amanem biyérung.

¹⁹ Séko ainem iperung emla míídudí bí turyé, idakkom séko imemla itídudí, bí siyé.

²⁰ Ruutum bí atímape míírí-míínyona amiem kangkidung, idakkom aina atíem inem ayadung.

²¹ Atímana amiem ingééyéku emnamdem no beroklado, idola deenampe yéna ami kídíe dem paamayé.

²² Akor kamana mime delok kampode uun koosiem éék nyoberlo ilíknam kísadung.

²³ Aina ami kídí lokke míínamde agínpe atírungko míílendung, loorímana ami kídíke míílen ilen namde mipil miyongem marmodung.

²⁴ Ayokon amie murkongem míngesumape pitdung, delokke dekepe idolate mirem yayang idung. Abíde mikit dolate opan yayang idung.

²⁵ Bidar langka, delo no jéyé. Amiem igul langka, delo nomkom igulyé.

²⁶ Are bojéyayém kokupe emla aliem mesiina amiem amie géédo, idola kodílo konem bulu yiddo.

²⁷ Nokke mííbomnamde aimílo nom mínggeyé, idola no ebínem mííbom dumílo dekepakpe no paayé.

²⁸ Agí kanamlo míídasuna kídíde gédílo anne dílpakna esing kísayé, idakkom deenampe yéna kídíde díyulok nelu kísadung.

²⁹ Agí ekum eralo ebín bonade yéyinlo atírung kayimayé. Mide yaode agínpe kénna amilokke béérape yéyé.

³⁰ Yéjiname turnamem bidung, idakkom díímín momín ine, dem inyok sudung.

³¹ Aina amikídíem tani amoso amanem bidung, dekepe iname atímana amiemlang paabna amiem, ingééyéku emnamdem nolu beroklado.