NGIITOM SIRUNG 1 - DEENA BAIBÉL (BSI)

Ngiitom Sirungke Are

¹ Si Dabidke oo delokke Israel roja Solomonke ngiitom kídare.

² Si ngiitom sirungsi noluk gyanem, delokke aina luyilem kangkén tatkén supekolo iguldung, delokke eerína agom kídíem tatkén modung.

³ Sikesi nolum minyorupe duupenamem, delokke jonnampe yépenamem, tetepe delokke aipe yépenamem poyildung.

⁴ Bulu kénsumana taniem milo aro modung, delokke yaamé koo kídíem edíípe kénmo dung.

⁵ Si ngiitom kídí si kénna paana amiem bojéyape kénmo dung, delokke kakot kénna amiem bedangem sutlík dung,

⁶ dekepe ikolok bulu eerína ngiitomem tatkén dung, delokke kénna paana ami kídíke agomem tatkén dung.

Yaamé Koo Kídíem Ngiitome

⁷ Kénnamem paape, no kerape Ruutum me pesope aido. Atí kénmana amikídíe gyanem mííbamang, delokke atíkote kéntope míímang.

⁸ Ngokke ua, nokke ane abuke ponamem tatgaplangka.

⁹ Buluke luyilde, leemo kanmo surongem kampoyanam kísape nokke séguem gaiyamodung.

¹⁰ Edílo paabna kídíe nom ikaayédí, ngokke ua, delo olík mapeka.

¹¹ Bulu poyé, “Aatola, kaju ngolu petpe namko matalaju! Ngoluke iman mankepe ami akonem molaju.

¹² Bulum ngoluke mapaayém turdope kaayé, idakkom ngoluke moyém bulu siyé.

¹³ Ngolu ami ekumem kurukla, remtí remtíem remnayé.

¹⁴ Kaju ngolukíng lekobosutola, ngoluke laasinam takamem ngolu orsulape.”

¹⁵ Dekena ami kídílo gímín gemapeka, ngokke ua, buluke lokke moote langka.

¹⁶ Bulu atímana agér imape doolamang. Bulu petga mogape míítídung.

¹⁷ Batpenam pettange kaasu dungem etku gonamde aimang,

¹⁸ idola dekena ami kídíe agíem batko supe emla etku godung, delo etkudelo bulu siyé.

¹⁹ Doppyo tíísinade agínpe doppyola yénamem míítídung, dekepe pettí motína amidekom idung.

Gyane Tomdung

²⁰ Tatgaptola! Gyane bedu bedalo, ami yékullo tomgodung,

²¹ taonlo ami duupomlo tomgoodung:

²² “Mide amie! No edítko midepe duutíyéne? Nolu edítko kénnamem lukaala yétíyéne? Nolu edílote kénkí tope míímanía?

²³ Tatgaptola, ngokke nolum lutem bikunamde idung; ngo nolum aina luyilem lula ngokke kénnamem bisupe míídung.

²⁴ Ngo nolum goktídung, nolum aalangka emla tomtídung, ilate nolu tatmang. Nolu ngom tatgemang.

²⁵ Nolu ngokke luyilem mepakto, delokke ngokkíng lusi lumo kosu goddung.

²⁶ Dekepe ila noluke duug adíryém ngo nolum ngilkaayé. Gíínam lomname aayém ngo nolum lungilyé.

²⁷ Delo gíínam lomname gumnampe aabomyé, nolu ankí kenue akén ayénmang iyé.

²⁸ Delo nolu kénnamem matayé, idakkom ngo poyan sumayé. Nolu ngom rego mipílo matayé, idokom nolu paamayé.

²⁹ Nolu kénnamem atírung inamang, delokke Ruutum me beleng gepenamem mepaksuto.

³⁰ Nolu edílote ngokke luyilem míímang, demangkom ngokke lusi lumuem tatgapmang.

³¹ Dekemílo, nolu noluke paaba sunamem paasuyé, delokke noluke ikor sudei nolum kimoyé.

³² Kangkí kénkímana tanie nyokdo, kapeila bulu gyanem mepak sudo. Atí kénmana kídíde buluke ankímalok nyoksudoku.

³³ Idola séko bulu tatgap dudí bulu edíípe míísuyé. Bí turyé, pesopenam legang atí kamayé.”