NGIILU TUUNA 2 - DEENA BAIBÉL (BSI)

Ashéng-angamde Agér Kamane

¹ Ashéng-angamde ingkoe emla deme kénkípe ngo ashéngpe yélendope míísuto. Idola dete loorímane emla ngo gaglento.

² Ngilman-soman sikom bopole, delokke ashéngde atí igulmang emlate ngo kénlento.

³ Kénnamem paalíla, ngo aponglok agíem aina longem dekelok paadope erbomlento. Tani among yékído anyongem tanike yépeko bedarunge emla ngo mííto.

⁴ Ngo botte-bottena agér kídíem ito. Ngo agíke supe ekum mola onggur ríkséngem ilíkto.

⁵ Ngo siipí-siiyé arík, delokke ríkséng ila, deddína ayé kana esingem leto.

⁶ Ngo pukuri koola arík delo asiem laalíkto.

⁷ Ngo deddína abílem rela, deddína abílem ngok ekum-eralo olento. Jirusalemlo dungkína tabungem pemílo pakyape simon-siliem ngo bomto.

⁸ Ngokke ruutum bomko among lokke kumsung kídílo sanam yimanam uun em delokke baldínem mekumto. Ngok aapí ashénge apíí-píílí dope, deddína miri paksong ina mime delokke milokong kídíem laadum sula duuboto.

⁹ Depeila ngok kerape Jirusalemlo yégena kídíem pemílo ngo mite-mirem runa amipe duuto, delokke ngokke kénname ngokkíng katímínto.

¹⁰ Ngokke míínam takamem ngo paayinto. Letel kokom ashéng-angamem ngo mepakmato. Ngokke agér-anam inam tabunglo ngo mííyumsuto, kapeila deke tabungde ngokke paanam amanpe ito.

¹¹ Idola edílo ngokke alagsok agér-anam inam tabung demlang, dekedem ipíng kolo ankang along sulíknamem kangkut suyékuem, de takam dooyi-esar méélamlo monmín genam kísa agér kamane, delokke doonyi rumkíso atí paapek paapenam kamang.

¹² Kapeila yétít tonam roja konke inam konemmin yébom duuna roja dete iladun. Depeila kénla yénam demlang, matumpe yénamdem delokke mito-huarpe yénam legangem ngo airupe míngkí lento.

¹³ Delo ngo, kaamoem kapekísa angune aiyadudí, delokke kísa matumem pemílo kénnamde gaiyane emla kénlenkai.

¹⁴ Kénna amide bedang gípekuem kaato sudung, idola matumde dekemang. Idola annyi pakde deeko tembenglo aayéku.

¹⁵ Ngo sipe míísuto, “Matum lok kísape ngokom nyokkunam bedalo aayéku, iname ngok kénkolok ingko koda aiyangkan?” Delo ngo sikom agér kamang emla míípasuto.

¹⁶ Matum ami akampe kénna ami demte longe kartít yékuem sékote kénsuyimayé. Kapeila matumna kísape kénna ami dekom longeko siyéku.

¹⁷ Depeila yénam si ngok kangkolo atí kamane. Kapeila tani amongso agér ina tabungde ngok kangkolo adír runame, delokke dooyi-esar méélamlo monmín genam kísane.

¹⁸ Doonyi rumkíso ngokke agér inam tabungdem ngo adírpe míítoku, kapeila deke agér inam tabungdem ngom yétít mínne yébomyéku.

¹⁹ De yétít kupenade matum kodí, kénna kodí séko kényén? Idola tani amongso ngokke ílnam saadope agér ibom sunam, ngokke kénnamem rallíkko takamlo de amide ruutum bomyéku. Sikom agér kamane.

²⁰ Depeila doonyi rumkíso ngokke erbomla agér itonam tabung teyolo ngo bursu along kaku.

²¹ Kapeila amikone bíkke gyanlok, kénnamlok, delokke ijiisunamlok, ipíng tonam agér dem, agísukepe ituakom, dem takam, atíkote idumsumana, amikon kolo, bí melík bikupe aiyé. Sikesi agér kamane, delokke si aimang.

²² Amie amongso ankírupe ibomsula, anka sulíkla agér ibom sukolok ingkona paapek koda doonyi rumkíso bí paadun?

²³ Longe-yohpe aapí-aange apéé bomsumape, ankí-kenolíkla, kilík-ramlíkla, tani bíkke longe takamem ilík tuakom deke tabungde asame. Depeila deke tabude agér kamane.

²⁴ Tani aralo gaiyalumnam atode, bíkke paalen-ilen sunam ato-siro teyolo doman-tíímanla ashéng angam inamde. Idola deke dete Shédí kelok aadung emla ngo kaangkai.

²⁵ Kapeila bík kékonlo sékoda dola-tííla ashéng-angam ilayén?

²⁶ Ingko amie Shédíme ashéng moyédí, deme bí gyanem, kénnamem, delokke ashéngem ruulíkdung. Idola paab ina amidem, bí ekuserang, atí-siríem idum sumopala, Shédíme ashémona ami teyolo bí ruulík dungku. Sikom dooyi-esar méélamlo monmín genam kísa agér kamane.