NEHEMIAH 8 - DEENA BAIBÉL (BSI)

Ayonem Ami kídílo Ejrake Rikan Biname

¹ Poolo kínídnane píírodem, Israellok ami kídíe buluke doolunglo duuyin líkto. Delo takam amie ami atel kísape Asi Lamgé kerangke gíídang delo aadumsuto; delokke bulu Ruutumke Israelem binam Mosike ayon kitabem bomang dope emla ngiitom poyilna Ejra me poto.

² Delo poolo kíníd nana lokke kerang yalum longe delo miri Ejrabí baane keralo, edítko mime-milope dem tatkén laatodí, buluke keralo ayon kitabem bomang bito.

³ Delokke Asi Lamgé kerangke gíídang delo mime-milope, delokke edítko tatkén lana amie katodí, buluke keralo bí roh lokke ila longe raadang loope kitab dem poribito; delokke delo ami takamke nyorunge ayon kitab porinam dem tatgapto.

⁴ Delokke poyilna Ejra bí delok moodí delok legape irungnam esing lok kyare monam teyolo dagto; delokke bík lakbíklo Mattithiah, Shema, Anaiah, Uriah, Hilkiah, delokke Maaseiah; delokke bík lakkélo Pedaiah, Mishael, Malkijah, Hashum, Hashbaddanah, Jekhariah, delo Meshullam bulu dagmín geto.

⁵ Delo Ejra bí ami takam kangkolo kitab dem lekyabito, kapeila bí ami kídíem pemílo kedon yang kolo dagto, delokke edílo bí kitab dem lekyatodí, delo ami takamde dagrepto.

⁶ Depe irodem Ejra bí, “Ruutum botteruna Shédíme yitgelangka!” emla, ami takam de buluke alage teyongpe ígon dola, “Amen! Amen!” emla tolíkdola mikmoe amongdanpe gupkuudola Ruutum me kumsula yidgeto.

⁷ Delokke Jeshua, Bani, Sherabiah, Jamin, Akkub, Shabbethai, Hodiah, Masseiah, Kelita, Ajariah, Jojabad, Hanan, Pelaiah bulu, delokke Lebi kídíde ami kídídem buluke agí-agí dakkollo dagdungem ayon legangem tatkéndope pomík bito.

⁸ Delokke bulu Shédíke ayon kitabem berok songkokpe porito; delokke porinam dem ami kídíe tatkén dope bulu gomroem pojon bito.

⁹ Delokke gobonor Nehemiah lang ayon poyilna, delokke miripe ina Ejra, delo ami kídídem poyilna Lebi kídíde ami takam dem sikepe luto, “Siloke longe si Ruutum noluke Shédíke keralo deedung; iname ankímapeka, demangkom kapmapeka.” Kapeila ami takamde ayon delok agom kídíem tatyéname kapyinto.

¹⁰ Delo Nehemiah bí bulum poto, “Nolu gílangkuka, delokke una atíem delokke tiina onggur alangem dola-tíílangkuka, delokke kamana kídí emte nok donam-tíínam lok anyongko melík bilangka; kapeila siloke longe si ngoluke Ruutum kelo deena longe; iname míídír mapeka, kapeila Ruutumke ashéng de noluke ralname.”

¹¹ Dekepeila Lebi kídíde ami kídídem aapí eetet dope, delokke dekena deena longelo míídír madope pogooto.

¹² Delokke ami takamde dodo-tíídokupe, delokke adín tarong kídíem melíkdope, delokke botterupe ashéng dokupe emla agí-agí ekumlo gítoku, kapeila bulu bulum pokan tonam agom kídíem tatkénto.

Ippo Gíídíem Ibomname

¹³ Loonyi nana longe delo, erang takam lok miro kídíe, miri kídíe, delokke Lebi kídíe ayonlok agom kídíem amung-aangpe tatdo-kéndope emla poyilna Ejra kelo aadumsuto.

¹⁴ Delo bulu poolo kíníd lokke doman gíídí-siipe idolo Israel ami kídíe ippolo duupe aido emla Mosikelo Ruutumke lulígnam legang ayonlo atnamko paato,

¹⁵ de idung bulu buluke doolung takamlo, delokke Jirusalemlo sim agom sim atkanla, delokke gogying bipe aiyé: “Nolu atnam sok kísape ippo ponana legape adi amonglo gíla olib esing, nyomrang olib esing, mirtel esing, delo pam esinglok aag kídílok, delokke abíd nemíng kana esing kídíem bomang langkuka.”

¹⁶ Dekepeila ami kídíde gílenla, lunam takam sim bomang yintoku, delokke buluke legasupe, agí ekum míílong teyolo, agí gíídanglo, delokke Shédíke ekum gíídanglo, delokke Asi Lamgé lokke gíídang lolang Ephraim Lamgé gíídanglo ippo kídíem políkto.

¹⁷ Delokke jine-pakbope yékolok aalatsukuna takam baanede ippo kídíem pola delo duulíkto; kapeila Nun ke oo Joshuake yédo delokke ila delo longe deloope Israel ami kídíe dekepe ikíyimato.

¹⁸ Delo gíídí delokke kerayalum longelok ila iyin longe loope, loodípe Shédíke ayon kitab lok orekko porito. Bulu longe kínídko domanem ibomto; delo longe píínyi nana delo ayon akorpe yélam dumsuem ibosuto.