NEHEMIAH 6 - DEENA BAIBÉL (BSI)

Nehemiahme Rungkupname

¹ Edílo ngoluke itempenam pongkok yang kaimape líísak etorem iyinnam legangem (idola deloope ngo yapgo lamgé kídílo eyab kídíem ilík mato) Sanballat, Tobiah, delo Arablok Geshem bulu, delokke ngoluke miru abíd kídíe tattodí,

² delo Sanballat lang Geshem bínyi ngom sikepe agom melíkto, “Aalangka, Ono Yiibe lokke doolung akonlo kaarík sulaju.” Idola bulu ngom aimape ipe emla mííbomto.

³ Delo ngo bulukíng ami melíkla sikepe poyansuto, “Ngo bottena agérko ibomdung, iname ngo delo toklamang. Ngo agérsim nolum kaarík sunam petom legape itum mayé.”

⁴ Lempiko bulu ngom agom dem melíkto, delokke ngokom akampakpe meyan sulíktoku.

⁵ Delo Sanballat bí lemngo nanaso taayanam shitiko bík béérang alaglok ngome melíkto.

⁶ Delo shiti delo sikepe atpa, “Ami kídí aralo si agom si pon-godung, delokke Geshemkom sim podung. No lang Jihudi ami kídíe mirolpe rollenpe emla ruubom mííbomdung; delok legapemin no líísak etor dem píbom dungkune; delokke sok lukannam sok ayonpe, no buluke rojape ipe emla míídung.

⁷ Delokke, ‘Judah amonglo rojako kadung,’ emla nok legangem Jirusalemlo pokan goodope, no kaalu-miri kídí emkom parlentung. Delokke supak sim agom kídí sim bottena roja kelo pokanyé. Delok legape supak aatoka, delokke so lupo-manmoem ibosulaju.”

⁸ Delo ngo sikepe bíme agom meyan sulíkto, “Nok lunam sok kísape atí inam kamang, idola no agíemin sim agom kídí sim nok aapí lok míílen sutune.”

⁹ Bulu ngoluke ibomdunam agér sim itumpe ngolume irít-siketto. “Idola supak, E Shédía, ngom tolmo toyika,” emla ngo kumto.

¹⁰ Longe konem ngo gílen lamape ekumlo duuna Mehetabel ke oten, Delaiahke oo Shemaiahme kaape bíkke ekumlo gíto. Delo bí ngom sikepe lupado, “Kumkeng Ekumke arang lokke arayang pírteklo lekope ngonyi runyok gela, eyab kídíem sittum sula duulaju, kapeila bulu nom petpe emla aayé, yoh kolo bulu nom petkape emla aayé.”

¹¹ Idola ngo poyansuto, “Ngo duggela rusi sugepena amimang. No ngome Kumkeng Ekum aralo ngok yénamem motursupe rusi sugeyé emla míídunía? Ngo dekepe imayé.”

¹² Delo ngo mííngíng tokunam, bíme Shédíbí políkmape idola Tobiah lang Sanballat bínyi ngom lutor dope relíktung emla, ngo kéntoku.

¹³ Ngo pesogela paab idope, delo bulu ngom atímana amín gemopenam pongkokko paala, ngom ngilka-luyéla idope emla bím relíkto.

¹⁴ Delo ngo, “E ngok Shédía, Tobiah lang Sanballat bínyi kape itídudí dem míípang sudaklangka. Kaalu mime miri Noadiah, delokke ngom irít-morítna polu-poorna abíd kídí takamem míípang sulangka,” emla kumsuto.

Agér Kídíem Iyinname

¹⁵ Pílen lokke looying pilngo kolang loonyi méélamlo, Elul poolo lokke looying annyi kolang longonana longe delo líísak etor dem píyintoku.

¹⁶ Edílo ngoluke miru kídíe sim legang sim tattodí, delo ngolum dunggona ami takame pesola, delokke bulu agíem míímésuto; kapeila sim agér sim ngoluke Shédíke igullok ipííto emla bulu kénto.

¹⁷ Delok teyolo, depe ido delo Judah lok miro kídíe Tobiah kelo deddína shitiem melíkto, delokke Tobiahke atyan sunam ekom bulu kelo pííto.

¹⁸ Kapeila Judahlo bíme bojéko pesona amie kato; legade bí Arah ke oo Shekaniahke magbope ito; delokke bík oo Jehohanan bí Berekiah ke oo Meshullamke omeme méngpe bomto.

¹⁹ Delokke bulu ngok keralo bík aina agér inamem pobito, delokke ngok agom ponam takamem bíme bulu pobito. Delokke ngom pesodope emla Tobiahbí shiti melíkla itítuai.