NAHUM 3 - DEENA BAIBÉL (BSI)

Ninebike Reyubrupe Adír Paaname

¹ Tani iyyilok lííyamna doolung no; menam-yadnam mílílo itína, líínam ekuserange alum mape bííyamla, milí-hodong yépom no yagorupe reyubna adírem paayé.

² Tatgaptola! Sabuk rímo demdudem, gaari kelong loodudem, guré dukdudem, delokke guré-gaari kídíke tondudem!

³ Guré dugbomna kídíe uglíkdung, yoksa kitnam kídíe latdung, gíníng kídíe punyindung! Deddínem paka-níkkaname, sanam yimanam simange; simang teyolo ami kídíe tube-tubre sudung.

⁴ Sikepe adír monamsi Ninebike notiipe igange. Bíkke kampolok, delokke simopena melnana kídílok, bí opín-buangem mella, bulume bí abílpe bomto.

⁵ Ralya yalumna Ruutum bí podung, “Ninebi, nom ngo ingéngyé. Ngo nome amíl araadope píkkutla, opín-buangem nome kaamoyé, nokke annying takamem kaamoyé.

⁶ Nok teyolo yaanem yoplumla belum dope imoyé. Ami takame reyubnamem kangkedope nom ngo iyé.

⁷ Nome kaana tabude, nokkelok santun geyéku. Bulu sipe poyé, ‘Ninebi bí kumrukpe ikai! Sékodí bíkkepe ayang anyongko kadune? Sékodí bíme ngingkupe mííyén?’ ”

⁸ Ninebi no Ijipt lokke luune botte Thebes me gaiyadunía? Tamtepe bíkom Nayil korongem bomtuai. Korode bíkke líísak etorpe ituai.

⁹ Bí Sudan emla Ijiptem ruutum bomtuai, bíkke ralname ralrí kamatuai; Libya de bíkke bonying ajoníai.

¹⁰ Idola Thebes ami kídíemkom abílpe umla monnyokto. Bene-bepong kéényung-regolo, buluke koo kídíem sidope dempet bito. Buluke miro migíng kídíem íkolilok yééla gíbolangkula, lotori soola bulume umna kídíe orpan bosuto.

¹¹ Ninebi nokom tíngír sulíknam kolo oletyé! Nokom nokke miru kídílok mopítsupe ikíyé.

¹² Edílo tapang ayé minyédí, delo aneme ngenkíyém dopenake nappalo ayé olíknam kísape, nokke kedonna líísak ekum kídíde iyinyé.

¹³ Nokke sipaying kídíde mime kídí kísadung, delokke nokke asi-amongde nokke miru kídí keralo itumsunana kamape dagdung. Nokke lamgé eyab kídíem sittumnana arem ool kídídem eme gukutyé!

¹⁴ Mimak ila nolum gargoo bompenam legape asiem irusulangka, delokke kedonna líísak ekum kídíem edííyadope itola. Líísak pínadope kédéngem tujét-tuyétla, líísagem iruutola!

¹⁵ Nolu ingkoem igedagakom, nolume sidope guyédada, demangkom mimaklo petyinyé. Takome ali kídíem dokutnam kísape nolume nyokyinmoyé. Nolu takom kísape parto!

¹⁶ Nolu bési-bépar ina amiem taleng telokke takar kídíem pemílo pakyape bojéyamoto. Idola alap kídíem taayala yopnyokkuna takom kísape, bulu supak kaimang.

¹⁷ Ansingdí longekolo, suppi kídílo asoope alungpe daggong gena takom kísape, nokke doolung ruutum kídíde idung. Idola edílo doonyie patlen dungkudí, delo bulu yopnyok dungku, delokke sékote buluke gíkuem kénmang!

¹⁸ E Assiria ke roja botte, nokke gobonor kídíe siyinkai, delokke nokke miro kídíe agínpe ipkai. Nokke ami kídíe, dííte kídarlo dukpan-dukran suyin gongkai, delokke bulume ekumlo langaang kupena kaimang.

¹⁹ Nokke kinam kídídem ipíkunana kuséréng kamang, delokke nokke tarí kídídem gééla mokumayé. Nokke olet kunamem tatna mipil miyonge ashéla alage pilíkkai. Kapeila sékokída nokke irí kamana atírumape iname aalíkmaton?