MIRILUNGGU 97 - DEENA BAIBÉL (BSI)

Shédí Bí Botterupe Yébone

¹ Ruutum bí Roje! Amonge ashélangka! Bokrange erlangka!

² Doomugelang ruruge bím yétgo bomdung; bí deenam loklang jonnamlok yébomdung.

³ Eme bíkke kerang keralo gíla bím gargoona mirukídíem gupakdung.

⁴ Bíkke yaarie tani amosim latkandung; dem amonge kaala dan-gedung.

⁵ Dííte moopange mutkyon kísape, Ruutum kelang tani among tabusokke Ruutum keralo yoldo.

⁶ Talenge bíkke deenam legangem pokan bidung; delokke ami takame bíkke angun ralnamem kaadung.

⁷ Mimang kumsula, míngkímsula yéna takamem annying moto. Ruutumke keralo shédí angu kídí takame kumdung.

⁸ E Ruutum, nokke bisarnam lok, Jayon lokke amie tatla ashédung, delokke Judah doolunge ashéla erdung.

⁹ E Tolya yalumna Ruutum, kapeila no among tabung sokke kedon yalumne; no angu shédí takamem botteyane.

¹⁰ Ruutum bí atímanem belumna kídíem ayadung; bíkke amikídíem bí mosiidung; atímana mirul amilokke bí bulum itumdung.

¹¹ Angune deenampe yénakídí teyolo latdung, delokke ashénge aapí gejiinalo duubomdung.

¹² Ruutum bíkkíng írgape ashélangka, nolu aapí gejiina kídíe, Deena Shédíke inamem míípasula, delokke bíkke deena amínem yidge langka!