MIRILUNGGU 91 - DEENA BAIBÉL (BSI)Ngolum Mopítbona Shédí 1 Séko Ruutum kíng duusigepe gídudí, Tolya yalumnake mopítko gooralo duududí, 2 de bím sikepe polayé, “No ngom mopítbone delokke itumbone. Nomin ngokke Shédíe; nokkíng ngo míída sudung.” 3 Kénpí sumanam gíímang siimolokke, delokke gérmang pena kinam lokke ngom bí ekerpe mesiiyé. 4 Bí nom labbínglok taapob bomyé; no bíkke pegoolo turyé; bíkke mínggapde nom mosing isiyé. 5 Yohlo no lomnam gíínam pesonam kamang, demangkom longem rubom tobomnam lokke pesopenam kamang, 6 demangkom kaamolo kilii-ramli, demangkom longem nyokpenam lokke pesonam kamang. 7 Nokke ampenglo éjar amie silado, nokke ampelo jaryingkope gargong lado, idola de nom atí imayé. 8 Atímana ami kídíem edítko ingéédune dem no agíe kaasuyé. 9 Ruutum bím nokke dungkepe duusi sukepe ikolok, Teyong yalumna bí nokke dungkepe ikolok, 10 nokkíng gííma simo kamayé, lomnam gíínam kamayé. 11 Kapeila bí bíkke teyong kotoki kídíem nom kaabomdope melíkyé, yéko takamlo nom gakbomyé. 12 Nokke ale elínglo tunyam sumadope, buluke alaglok nome gakpít bomyé. 13 No myomur emlang tabíem, pesorunam myomurem, delokke asum aar kana tabíem tujémyé. 14 Shédí bí podung, “Ngom ayana kídíem ngo laasiyé, delokke ngom Ruutum emla kénna kídíem ngo mopítyé. 15 Edílo bulu ngom gogyédí, ngo bulum tatyé; buluke adírduem ngo bulukíng duumínyé. Ngo bulum laasing mosiiyé delokke mínggeyé. 16 Buluke amanpe ngo bulum oolko turmoyé; ngo bulum kaasiyé.” |
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
Bible Society of India