MIRILUNGGU 9 - DEENA BAIBÉL (BSI)

Shédíke Teteng Ayon Legape Yidgename

¹ Ngokke aapí-aang tabulok Ruutum bím ngo yidgedung; nokke irisinyo inam agér takamem ngo pogeyé.

² Nokke legalok ngo ashéng miriem luyé, nom mirilok ngo rínggeyé. E Ralya yalumna Shédíe.

³ Nokke ngéngka suyém ngokke mirukídíe oletla sido.

⁴ Legade no nokke jonna ayonem mosiisudo, no palenglo duula ainam kebangem baato.

⁵ No shédí kamana ami kídíem lungééto, delokke atímana kídíem petpakto; no buluke amínem mepak ayartoku.

⁶ Ngoluke miruem nyokyar motoku; buluke taonem kurukto, delokke bulum míípang berok suyimang.

⁷ Idakkom Ruutum bí rojape duuyarne; bisarduem, bíkke paleng dem dungkepe ito,

⁸ delokke bí tani amosim arolok bisaryindung, ami takamem akampe kaadung.

⁹ Ruutum bí iréénam kídíke duusi sukenge, adírduem gakda sukenge.

¹⁰ Delokke nokke amínem kénna kídíe nom míídasuyé Ruutum. Nokkíng aana kídíem no sékomete mepakmang.

¹¹ Jayonem duubomna, Ruutum bím miripe ríngge langka! Opín takamlo bíkke inamem pobilangka!

¹² Arééna kídíem Shédí bí míípa sudung; buluke kapnamem bí mitpan sumang, delokke bulum irééna kídíem, bí ingééyéku.

¹³ E Ruutum, ngom ayatoika! ngom akna kídílokke ngom iréénamem kaasutola, sipe kolokke ngom gaksing tokuika,

¹⁴ demílomin ngo Jirusalem amikídí keralo dakdola, nom ngokke rínggenam legang takamem bulum ngo lukan biyéne. Ngo ashénge séngééyé, kapeila no ngom turmotoku.

¹⁵ Shédí kamana amikídíe buluke koonam arusulo olíkkai; buluke agíke songkit sulo okkosukai.

¹⁶ Ruutum bí aina bisarlok agísuem lengkansuto; atímana ami kídíde agí agérlok batko sutoku.

¹⁷ Shédíme mepaksuna, takam atímana kepe sinamde buluk gípekue.

¹⁸ Kapeila pííramnem agínpe mitpan sumayé, delokke opan kídíke míínam subomnamde agínpe duuyaryé.

¹⁹ E Ruutum, ami kídíem no lubul kosumapeka; Shédí kamana kídíem nokke keralo laangala, buluke teyolo bisarem ilangka.

²⁰ Bulum pesodope itoka E Ruutum! Sipena tanie emla bulum kénsumotoka.