MIRILUNGGU 89 - DEENA BAIBÉL (BSI)

Doolung Gííma Simoduem Lunam Miriko

¹ E Ruutum, ngo nokke ooyimana ayangem rínggeyé; ngokke nappalok nokke edíínamem siirum takamlo pogeyé.

² Ngo kéndung nokke ayangde agínpe duuyarne, nokke edíng de taleng kísape duuyarne.

³ No poto, “Ngo ngokke ullennamlo daapongem mobosuto, ngo ngokke béérang kídíem pébisuto;

⁴ ‘Nokke otíng oyinlo rojem duuyarmoyé; ngo nokke opínem agínpe mosiiyé.’ ”

⁵ E Ruutum, teyong amonge nokke irisinyo inam atíem miripe rínggedung.

⁶ Ruutum nom, sékome taleng telo luyii supene? Taleng telo duuna atíe séko Ruutum nokke kísanako kadun?

⁷ Nom deena kídí gooralo mínggedung, delokke bulu takame nom pesogedung.

⁸ E Ruutum, Tolya yalumna Shédí, séko nokke kísape toldu raldune? Atí takamlo no mínggapdung, E Ruutum.

⁹ No ralna siyéngemte alaglo bomne; no sokke situm emte remak mokune.

¹⁰ No asi uyu Rahab mete ikumla petne; nokke ralnamlok nokke miruem ikumto,

¹¹ talengde nokke, amodekom nokke; tani among silang delo duuna takamem no píyinto.

¹² No línggíng sokkuem píto; Tabor díítelang, Hermon dííte nom ashépe miri lugedung.

¹³ No ralnarungko! nokke ralname séngééne!

¹⁴ Nokke amode deenam loklang jonnamlok pílenname; ayangemlang mínggabem nokke agér takamlo lengkandung.

¹⁵ Nom mirilula kumsuna kídíde edítko ashédun, nokke ayang angunlo duuna amikídíde edítko míípodun.

¹⁶ Nokke legalok bulu longe rubungem ashédung, delokke nokke aikolok bulu nom koyitdung.

¹⁷ No ngolum botterupe ikumnamem bito; nokke ayanglok no ngolum ikummoto.

¹⁸ Ngoluke tamtede Ruutumke, ngoluke rojade Israel lokke Deena Shédíke.

Shédíke Dabidme Pébisuname

¹⁹ Kaarí kaanyolo konnying mennying no nokkelo míngkesuna béérang kídíem poto, “Ngo amín kana sipayingko igulto; ngokke ami gooralok ullennam amikolo roja palengem bito.

²⁰ Ngokke roja Dabidme deena téllok nyoola ngokke béérape tosakto.

²¹ Ngokke ralname agínpe bíkkíng duuyé, ngokke ralname bím ralmoyé.

²² Bíkke mirue bím iru lamayé. Atímana mirul amie bím ikummayé.

²³ Ngo bíkke mibo miruem samjémyé, delokke bím nena mipagem ngo petyinyé.

²⁴ Ngokke mínggap elang ngokke ooyimana ayange bíkkíng duuyé, delokke ngo bím agínpe ikum moyaryé.

²⁵ Ngo bíkke amongem Raadang Siyénglokke ila Euphrates asi korong loope bottemoyé.

²⁶ Bí ngom poyé, ‘Nomin ngokke abue delokke Shédíe; no ngom mosiine delokke mopíbone.’

²⁷ Ngo bím obíng yalum oope imoyé, takamem botteyalumna rojape imoyé.

²⁸ Ngo agínpe bíkkíng pébisunamem bomyé. Delokke ngokke bíkkíng ibosunam daapode duuyaryé.

²⁹ Bíkke adongde taleng kísape duuyaryé; bíkke otíng oyinde rojem duuyarbomyé.”

³⁰ “Idola bíkke otínge ngokke ayonem mepaksula ngokke lulíklok yémang yémílo,

³¹ bulu ngokke ayonem betla ngokke ngiitomlok gímayémílo,

³² delo ngo bulum buluke paab ikolok ingééyé; buluke imem adírem gesudokupe ngo bulum iyé.

³³ Idola ngokke Dabidme ayang namem memayé, delokke ngokke mínggap emte elumokumayé.

³⁴ Ngo ngokke bíkkíng daapong ibosunamem mepakmayé, demangkom ngokke nabbéllok lenna agom dem angupe ikumayé.”

³⁵ “Lennyi agom kamape ngokke deena amínlok ngo duuyardope pébisuto, ngo edílokom Dabidkíng menam lumayé.

³⁶ Bíkke odongde duuyaryé, delokke ngo bíkke amongem doonyike saadak tetengem kaabomyé.

³⁷ Si poolo kísape duuyaryé, talenge duudu tetedem sikom duuyé.”

Roja Ralmangkolok Ankí Kenoname

³⁸ Idakkom no supak lupak sudungku, nokke tosaknam roja teyolo no yagorupe mardung.

³⁹ No nokke bééralo ibosunam daapongem mepaksuto; bíkke roja dumlubem suyunglo yoplíkto,

⁴⁰ no bíkke baane yapguem bénpakto, bíkke língkangem no bénpakto.

⁴¹ Gípatna takame bíkke atíem laasidung; bíkke donggong lamgé takame bím ngilkaadung.

⁴² Ikumnam amínem no miru kídílo bito; no bulum takam ashénge imoto.

⁴³ Bíkke mimak sérangem no agér kamomato, depeila bím mibue ikumto.

⁴⁴ No bíkke roja banggénem laabíntoku, delokke bíkke roja palengem amolo gepakto.

⁴⁵ No bíkke yénamem lootumoto; delokke bím annyirunge imoto.

Mopít Dokupe Kumnamko

⁴⁶ E Ruutum, edítko no agíe rusi suyéne? Edítko nokke marlíde emepe doryéne?

⁴⁷ Míngkílangka ngokke yépename edítko andeng dune; aníng kítoka no ngolum takam sipenape pítobong!

⁴⁸ Tanie séko simape duuyar penako kadun? Kape kísa tanie agíem agolokke mopít sulayéne?

⁴⁹ E Ruutum, kerangke nok ayang lengkanname ingkoloda? Dabidme pébisunam atíe ingkoloda?

⁵⁰ Míípasulangka E Ruutum, nokke béérang ngome kapedí lukaatone; Kape kísadí ngo mipak ami kídíke béénamem donggetone.

⁵¹ Nokke mirukídíe nokke ullennam rojem lungildung! E Ruutum, ingkolo gíyédí bulu bím lukaadung.

⁵² Ruutumke amíne duuyar kalangka! Amen! Amen!