MIRILUNGGU 86 - DEENA BAIBÉL (BSI)

Iguldope Kumnamko

¹ E Ruutum, nokke nyorunge genínla ngom tadíítoika, kapeila ngo ralmang delokke pííramna amiko.

² Ngokke turnamem mosing toika, kapeila ngo deenampe yéne; ngom laasing toika, kapeila ngo nokke béérange, nom ngo míngkesudung.

³ No ngokke Shédíe; E Ruutume, ngom yaasamtoika; nokkíng ngo loodíke kumdung.

⁴ E Ruutume, nokke béérangem ashéng motoika, kapeila ngokke kumname nokkíng píídung.

⁵ No ngolum aidung delokke mesam bidung, nokkíng kumna takamem apíípe ayane.

⁶ E Ruutum, ngokke kumnamem tadíítoika; ngokke rogunamem tatgapbika.

⁷ Adírdo longelo nom ngo gokdo, kapeila no ngokke kumnamem tatdung.

⁸ E Ruutum, shédí gooralo nokke kísana kamang, nokke inam kísape sékote ina kamang.

⁹ Nokke pínam mipak takame nokkelo aayé E Ruutum, bulu nokke keralo kumsuyé, delokke nokke amínem erkígeyé.

¹⁰ Kapeila no bottena delokke irisinyo atíem ine, no petommin Shédíe.

¹¹ E Ruutum, nokke bedangem ngom luyiltoika delo ngo nokke aro bedalok gíyé, apíípe nom kumdope ngom no luyiltoika.

¹² Ngo nom ngokke aapí-aang tabulok yidgeyé E Ruutum ngok Shédía, delokke ngo nokke amínem agínpe rínggeyé.

¹³ Nokke ngokkíng ooyimana ayangde edítko bottene! No ngom agolok laasingtoku.

¹⁴ Bottepe míísuna amikídíe ngom míílo aabomdung E Shédía. Kaníína ami opééko ngom petpe emla anbomdung- dekede nom mínggemana amikídíe.

¹⁵ E Ruutum, idola nodan yaasamne delokke ayana Shédíe, martumane, ayang igulne delokke arorune.

¹⁶ Ngokkíng ngébang toika delokke ayangtoika; nokke ralnamem ngom bika, kapeila ngo nom kumdung, ngokke ane ibomnam kísape.

¹⁷ Nokke ainam iyodem ngom lengkan toika; E Ruutum ngom kangkina kídíe, nokke ngom ngiinam emlang igulem kaayém bulu annying suyéku.