MIRILUNGGU 85 - DEENA BAIBÉL (BSI)

Doolung Yéname Yépodope Kumnamko

¹ Ruutum no, nokke amongem ayasula Israel amikídíem jémotoku.

² No nokke amikídíke paabem mesam bitoku, buluke imemem mesam bitoku.

³ No buluke teyolo marnamem metoku; delokke nokke martíknamem ngaisutoku.

⁴ Ngolum mosing tokuika, ngolum mopítkuna Shédíe, delokke ngolum míínying namem metokuika.

⁵ No ngolum agínpe marbom ayar yénía? Nokke marlíngem siirum siirum mipílo duutí moyénía?

⁶ No ngolum edíí molangkuka, delokke ngolu, nokke amikídíe nom yidgeyé.

⁷ E Ruutum, nokke duuyarna ayangem ngolum lengkan kuika, delokke ngolum nokke turnamem bika.

⁸ Ruutum Shédí bí ingkuem poyédí ngom tatmoi, ngolu atímana bedalo gílat sukumayémílo, bí bíkke amikídílo ayang dengomem pébisudung.

⁹ Bím mínggena kídíem berokpe bí mopítyé, delokke bíkke mopít nana ralname ngoluke amoso duuyaryé.

¹⁰ Ayangelang míngkenge dakríksuyé, yéjinamelang yéponame gyabbosuyé.

¹¹ Tanike yéjiname amosok saayé, delokke Shédíke aroe taleng telok kaatoksuyé.

¹² Ruutum bí ngolum jémoyé, delokke ngoluke amonge edíípe aliem lenyé.

¹³ Ruutumke keralo yéjiname gígeyé, delokke bíkke bedangem mogebiyé.