MIRILUNGGU 84 - DEENA BAIBÉL (BSI)

Shédíke Ekumem Míítíname

¹ E Tolya yalumna Shédí! Nokke Kumkeng Ekumem ngo airupe míídung!

² Ngo edítko delo duuduamang emla míídune? Ngo Ruutumke Kumkeng Ekumlo duulínge idung. Ngokke aapí-aang tabung si turna Shédíme miripe rínggedung.

³ Ngiití períete asup supdo, delokke oosonge agíke ekum kado; delokke ngokke Shédía, bulu agíke ome-oo kídíem nokke deena runggu kídar anínlo medo. Tolya yalumna Ruutum, ngokke Roja, delokke ngokke Shédí.

⁴ Nokke Kumkeng Ekumlo duuna kídíde nom miripe rínggela edítko ashédun.

⁵ Nokke ralnamem paana kídíde gérne, Jayon díítelo kaalíng mibope enna kídíde gérne.

⁶ Bulu Baka yiibelok gíname dem siirung lenko amope imoto, pedonge dem paatape imotung.

⁷ Bulu en-yayang tolyayang. Jayon díítelo shédí kídíke Shédíme bulu kaayé.

⁸ E Ralya yalumna Ruutum Shédía, ngokke kumnamem tattoka; E Jakobke Shédía tatgap langka!

⁹ E Shédía, ngolukepe nokke ullennam rojem lubiyika.

¹⁰ Longeko nokke Kumkeng Ekumlo yénamde regokonlo longe éjarko yénam empemílo béédam yadung. Atímana mirul ekumlo duupemílo, ngo Shédíke ekum lamgélo daknamdem aiyape míídung.

¹¹ Kapeila Ruutum Shédí bí itumbonelang angun ralname; bí ngolum ayang aapíemlang bottena amínem bidung. Aina atíem ina ami kídíke paapenam aina atíem bí lutummang.

¹² E Ruutum, nom míídasuna kídíde gérnarunge.