MIRILUNGGU 83 - DEENA BAIBÉL (BSI)

Israelke Miru Kídíem Ikumdope Kumname

¹ E Shédía, asoope rugemayika; no asoope doomayika demangkom pebum remang imayika.

² Kapeila nokke mibo mirukídíe ebín ebon idung, delokke kangkina kídíe nom ikísupe irepdung.

³ Bulu nokke amikídí teyolo miru aapí gedung; nokke ayanam ami teyolo bulu atímape ipe emla rudung.

⁴ Bulu ludung, “Kaju buluke opínem ngolu petyinlaju, Israel amín tatpang yimadope ilaju!”

⁵ Buluke míírep bomnamem bulu lekobosudung, delokke lekope bulu nom atímape ipe emla pobosudung.

⁶ Edom delokke Ishmael amikídíe; Moab delokke Hagrit kídíe,

⁷ Gebal, Ammon, delokke Amalek kídíe, delokke Philistia, delokke Tur amikídíe,

⁸ Assiria ete bulum idumsula, bulu Lot ke paknarung ome-oo kídíem bonying mobosuto.

⁹ No Midian kídíem kape itodí dekepe bulum ilangka, delokke Kishon Korolo Sisera melang Jabinme kape itodí depe ilangka.

¹⁰ No bulum Endorlo ikumto, delokke buluke simade amolo yangkai.

¹¹ Oreb melang Jipme inam kísape, buluke ruutum kídíemkom itoka. Jebah melang Jalmunname inam kísape, bulum yébona takamem ikumtoka.

¹² Bulu sikepe ludungai, “Ngolu ngolukepe Shédíke amongem laayé.”

¹³ E ngokke Shédía, bulum pemuk kísape gyanyok molangka, asarlo gyapakna amyang kísape ilangka.

¹⁴ Eme moonamem gunam kísa, dííte moopalo meyo saana kísape,

¹⁵ no bulum gumnampe guma bomlangka, delokke dííne mémutlok etbomla bulum irítlangka.

¹⁶ E Ruutum bulum annying pesagem ragge molangka, delokke nokke ralnamem bulum kangkén sumolangka,

¹⁷ bulum ikumla igíp gípyar langka; bulum annying mola nyokmo langka.

¹⁸ Ruutum emla amín gena no petom mino tani amosokke Kedon yalumne emla bulume kénsudope no ilangka.