MIRILUNGGU 80 - DEENA BAIBÉL (BSI)

Doolungem Kaasing Dokupe Kumnamko

¹ Israel lokke Kaabomne tatgap langka, mérem gígebona no; Sérubim lappoonam roja palenglo duudola angun bona no tadíítola.

² No agíe Ephraim, Benjamin, delokke Manasseh opín kídílo lengkan sulangka. No agí tolnamem lengkansula ngolum mopítoika!

³ E Shédía, ngolum mosing tokuika; ngolu turdokupe, ngolum yaasam tokuika!

⁴ E Ruutum Shédía nokke ami kídíke kumkolok no edítko martíyéne?

⁵ No ngolum isi-marmem leemo líkdung, miksi batiem tíímotung.

⁶ No ngolum dunggona doolung kídíem ngolum mimak imoto.

⁷ E Tolya yalumna Shédía! Ngolum laadum sutokuika. Ngolu turdokupe nokke yaasamem ngolum lengkan toika!

⁸ Ijiptlok no onggur aneko bomlangkula; mipak kídíem monpak geyéla, no dem díílíkto.

⁹ No dem ngéla isaato; de eerípe appír pírketla, iname de among tabungdem maabomkai.

¹⁰ Si dííte moopangem saapokai, sokke aagde bottena sidar esingem ríakkai.

¹¹ Sokke appíre Raadang Siyéng lokke ilangala, Euphrates asi korolope píngkai.

¹² No kapeila etor kídíem bénkan? Supak gípang gípane, sokke onggur ayém pílsiyé.

¹³ Moonam lokke simon sire dem nudípyé, delokke de simon sili dotképe iyé.

¹⁴ E Tolnayalum Shédíe, ngéba dolangkula teyong telok ngolukíng kaasu tolangku; aala nokke amikídíem mosing tolangku!

¹⁵ Nokke díílíknam onggur anem laasing kakupe aatolangku, si nokke lelíknam anesi edíngkai!

¹⁶ Ngoluke mibo mirue sim emelok baapakto, bulu dem teeletto; bulum marbomla petpaktoka!

¹⁷ Nokke ullennam amikídí, nokke edííruna opínkope ruunam sim bomgap langka.

¹⁸ Delokrongem ngolu nokke lok ngéngkur kumayé; ngolum turnamem bitoka; delo ngolu nom rínggeyé.

¹⁹ E Ruutum Tolna yalum Shédía, ngolum yaasamtoika, delo ngolu turyéku.