MIRILUNGGU 78 - DEENA BAIBÉL (BSI)

Shédí Delokke Bíkke Amikídíe

¹ E ngokke amikídía, ngokke luyilem tatgap langka; ngokke nappalok ponam agomem tadíng langka!

² Ngo aro ngiitom eke podak delokke kerangke kénpímanam atíeke pomík bidak.

³ De atí kídíde ngoluke abu kídíke ngolum ponam eke.

⁴ Ruutumke angun ralnam agérem delokke bíkke ralnamem, bíkke irisinyo agér anamem, ngo méélam yépena ome-oo kídíem, pobimape asoope memayé.

⁵ Bí Israel amikídílo ayonem bito, delokke Jakobke ome-oo kídílo ngiitomem bito. Buluke ome-oo kídílo ngiitom ponam luyilem podope, ngoluke abu kídíem pogapto;

⁶ delo méélam yépena kídíe dekedem kényé delokrongem bulu agí ome-uem poboyéku,

⁷ delomin bulu Shédíkíng míída suyéne, delokke Shédíke agér itonamem mitpan sumape agínpe bíkke ngiitomem igeyéne.

⁸ Bulu buluke buku kísa ipéésula agom tatmape ila, delokke Shédíkíng míngkeng edíímape inam kísa imayéne.

⁹ Ephraim opín kídíe iyyi epuk bomla mimak ido longem duggetoku.

¹⁰ Shédíkíng daapongem bommape igeyéla bíkke ayonem igetope imang.

¹¹ Bíkke ibinam atíem bulu mitpansuto, delokke bíkke bulum irisinyo lengkan namemte míípang suyimang.

¹² Buluke abu kídíke matanampe Shédí bí Ijipt amolokke Joan yiibelo irisinyuem iboto.

¹³ Bí siyéng asiem péépansula bulum asi raadalok gímotoku, delokke asiem pooyipe eelat motoku.

¹⁴ Longem bulum bí doomug ugyumlok gíbotoku, delokke yoh rubungem meru angunpe gíbotoku,

¹⁵ Bí mooruk amolo lírengem demké geyéla bulum rumkí belok asiem tíímoto.

¹⁶ Bí líírelok sirungem lendope ito, delokke asiem korope tokdope ito.

¹⁷ Depeilate bulu bím ipéésula bojépe iyakto. Kedonruna bím mooruk lote ipéésuto.

¹⁸ Buluke míínam emlang dotkéem kotíbomla bulu Shédíme ikíteríng rupe ikaato.

¹⁹ Bulu Shédíme akla poto, “Shédí bí mooruklo donam bilayénía?

²⁰ Bí líírengem demla asie biilendope ito. Dekepe bí ettíng bila, demangkom ami kídíe dodope adínem bilayénía?”

²¹ Delo Ruutum bí dem tatla marto; bí emepe bulum dorbomto, delokke bíkke marlínge buluke teyolo angkai;

²² kapeila bulu Shédíkíng míngkeng kamape bíkke mopít kunamlo míída sumato.

²³ Idakkom bí talengem luposula, delokke teyong eyabem siyyadope ito;

²⁴ Bí bulum taleng telok ali-ayém bito, delokke manna dotké emte melíkbito.

²⁵ Dekepe iname bulu teyong kotoki kídíke dotké em doto, delokke Shédí bí buluke dolínam takamem bulum bito.

²⁶ Bí sanggo asarem yabmoto, delokke bíkke ralnamlok sokko asarem mutmoto.

²⁷ Delokke bíkke amikídíem bí korolok siiyé kísape bojérupe pettangem adínpe bito.

²⁸ Dekede notko raadalo tombu ayir takamlo olíkto.

²⁹ Shédí bí buluke míínamem bito, dem bulu dola dodarto.

³⁰ Idola buluke míínampe dobíng sumang adape buluke dongodungem,

³¹ Shédí bí maryéname Israel lokke yaamé yalum, midu yalum amikídíem petpakto.

³² Sike takamem kaalate bulu paab ití teteto; bíkke irisinyo inam kékon delote bulu bím míída sukumang.

³³ Dekepeila buluke longem bí ngarum atel kísape nyokmoto, delokke buluke yénamem menang asak gérmamoto.

³⁴ Edílo bulum ayokonem bí pettodí, delo bulu bím matato, bulu míílat sulangkula, Shédíme ankírupe kumsuto.

³⁵ Shédí bí bulum ikumbone, Teyong yalum Shédí bí bulum mopítkune emnamdem bulu míípang sutoku.

³⁶ Idakkom buluke agom lunam takamde menameke; buluke ponamde arona kamang;

³⁷ Bulu bíkkíng míída suyimang; bulu bíkkíng daapong ibosunamem arope míngkumang.

³⁸ Depe ilate bí ayang míípang sunape iname, ami kídílokke paabem mesam bito, delokke bulum petpakmang. Deddíko bí bíkke marlíngem míímapsula, bíkke aklíngem míímosutoku.

³⁹ Bí mííto bulu duuyar pemane, asarpe mutynyok penam atíe.

⁴⁰ Edítko mooruk amolo bulu bím akpésula buumoton!

⁴¹ Bulu Shédíme ikup silatla, darkang katíto, delokke Israel lokke Deena Shédíme adírmoto.

⁴² Bulu bíkke botteruna ralnamem delokke bulum mibolok laasing kunam longem mitpan sutoku.

⁴³ Ijipt amolok Joan yiibelo bíkke pesorunam irisinyo agérem bulu mitpan sutoku.

⁴⁴ Bí korong asiem iyyipe ikuname, Ijipt amikídíe asi tíípeko kaimang.

⁴⁵ Bí buluke gooralo bulum irééna tamidem melíkto, delokke buluke amongem ibít-sikat dope, tatíg emte melíkto.

⁴⁶ Bí buluke aliem doyin bidope, delokke arígem katyindope pemírem melíkto.

⁴⁷ Bí tapílok buluke onggur ayém gepakto, delokke buluke rípumem ngarkamlok siyinmoto.

⁴⁸ Bí buluke bomnam taroem tapílok gepetto, delokke buluke sobénem doomír yaarilok simoto.

⁴⁹ Bíkke simo nyokmona marlíngem bí melíkla, bulum adír asonge, yényi-yésue imoto.

⁵⁰ Bí bíkke marlíngem míímap sukumang, delokke buluke turnam emte mesammang, idakkom bulum kiliilok petto.

⁵¹ Bí Ijíptlo duuna erang kídí lokke, oge yalumnam takamem petyinto.

⁵² Delokrongem bí bíkke amikídíem mér bénbam kísape goolentoku, delokke mooruk amolo bulum sobén kísape gíbotoku.

⁵³ Bulu pesomadope bí bulum depe gílen botoku; idakkom siyénge buluke miruem biilumtoku.

⁵⁴ Bí bulum deena amolo agíe ikumla laabínnam díítelo bomatoku.

⁵⁵ Bí dungkusuna, among delokke ami kídíem monpakto; bí buluke amodem Israel opín kídílo pansubito delokke buluke ekumem bíkke ami kídíem bito.

⁵⁶ Idakkom bulu Teyong yalum Shédíme akpésula delokke bím darkaato. Bulu bíkke ngiitomem igemang,

⁵⁷ idola buluke abu kídí akampe bulu akpésula míídasumape yéto, míída sumanam iyyi epuk kísape ito.

⁵⁸ Buluke rego regolo uyu kumsunam atíde Shédíme iakto, delokke buluke mimang kumsude bím séngéépe marmoto.

⁵⁹ Shédí bí dem kaayéname bí marlínge séngéékai, bí Israelem berokpe topaksuto.

⁶⁰ Bí Shiloh doolulo notko inamem metoku, delo bí ekumpe ami gooralo duutuai.

⁶¹ Bí bíkke ralnamemlang angun ralnamem dunggena Daapong Sondungem mirue laabíndope melíkto.

⁶² Bí bíkke amikídíem marbomla, bulum buluke miru kídíem petmoto.

⁶³ Yaamé kídíem mimaklo petto, delo mimum kídíem méngpe laapena kaimang.

⁶⁴ Miri kídíe yoksalo silíkkai, delokke buluke meyéng kídídem kapmo ríímomato.

⁶⁵ Méélam delo Ruutum bí ipmilok darngosuna kísape ikai; bí tíngírsuna erna midu ami kísape ito.

⁶⁶ Delo bí bíkke miru kídíem monpaktoku; bí bulum annyirunge idope ito.

⁶⁷ Bí Josephke otíng kídíem toyimato, Ephraim opínemkom bí toyimato,

⁶⁸ idola bí Judahke opínemla bíkke ayanam Jayon díítem tosiito.

⁶⁹ Delo bíkke teyong among ekum kísape bíkke Kumkeng Ekumem delo molíkto; bí duuyarna moone among kísape dem edíírup ito.

⁷⁰ Bí Dabidme bíkke béérape ullento, delokke mér gooralok bím laalento;

⁷¹ delo bí bíkke sobén kídíem kaabomla, delokke bím Israel lokke rojape ullenla Shédíke ami kídí lokke mér ruutumpe meto.

⁷² Dabid bí bulum mínggapla yéboto delokke bulum kampope yéboto.