MIRILUNGGU 74 - DEENA BAIBÉL (BSI)

Opín Tabungem Melendokupe Kumnamko

¹ E Shédía, no kapeila sikepe ngolum mepak sukane? Nokke amikídí teyolo no maryar abuuyénía?

² Nokke kerango pekai ullennam nokke amikídíem, nom agíem yégena opínpe idope emla abílpe yédungem nokke laalen kunam ami kídíem míípang sulangka. Nokke leko dungkíko Jayon Díítem míípang sutokuika.

³ Sikepe miru kídíke Kumkeng Ekumlok atí takamem bénpaknamem no kanggo sutola.

⁴ Nokke mirukídíe nokke Kumkeng Ekumlo ikum taapuem gaadungku; bulu agí agí jandiem ikumnam iyodpe tuulíkto.

⁵ Bulu esing teena ami kísape esingem bulu egílok teeletto.

⁶ Delokrongem bulu gaang esing takamem agí martullok dempen demrento.

⁷ Bulu nok Kumkeng Ekumem bénpala eme rílíkto, bulu nokke dungko amongem ibulto.

⁸ Bulu ngolum petyin berokpe míítuai, delokke bulu deena among tabungem rompakto.

⁹ Ngoluke deena iyod sangode nyokkai, delo kaaluna miri atelkote kayimang, delokke edítlope sikepe iyédí sékote kénmang.

¹⁰ Edítko mirukídíe nom ngilkang katíyéne E Shédía, bulu nokke amínem agínpe lukaayénía?

¹¹ Kapeila no ngolum igul límape ikane? Nokke alage kapeila lakkut sukane?

¹² Idakkom E Shédía, yélen lokkekai no ngoluke Roje; no ngolum deddíko laasitoku.

¹³ Nokke tolnam kotírlok no siyéngem pépansuto; asilokke uyu dumpongem dempetto.

¹⁴ No asilokke uyu ruutum Bíríbít dumpongem petto, no bím mooruk amolokke simonem dotképe bito.

¹⁵ No roojigem delokke sirungem pílento, no bottena korongem oomoto.

¹⁶ Longe dekom nokke, yoh dekom nokke; no doonyiemlang pooloem duubangkolo melíkto.

¹⁷ No amosokke duuríkuem píto; no díyu dígínem píto.

¹⁸ Idakkom E Ruutum, kénsu langka, nokke mirue nom ngilkadung delokke lukaadung; kapeila bulu Shédí kamang.

¹⁹ Nokke opan mimang kídíem kaníína miru kídílo melík mayika; iréénam nokke amikídíem no mitpan sumayika!

²⁰ Nokke ngolukíng ibosunam daapongem míípang sulangka. Delo amodelo kaamoko kéényung kerelo momín lumíne kadung.

²¹ Mínggípsuna kídíem annyi momayika; mimang opan kídíe nom yidge daklangka.

²² E Shédía, darepla nokke legangem no mosing sutolangku. Míngkítoka edítko míngkesumana kídíe lolope lukaayéne!

²³ Nokke miru kídíke marla uktínamem, nokke miru kídíke tayyémpe mannam em mínggap gelangka.