MIRILUNGGU 72 - DEENA BAIBÉL (BSI)

Roja Legape Kumnamko

¹ E Shédía, nokke aro ayonem Rojaso bitoika, delokke nokke deenam bedangem roja teyoso bitoika!

² Delo bí nokke amikídíem tetelok yébodope, delokke nokke opan kídíem deena ayonlok duubodope.

³ Amikídí legape amonge jékalangka, delokke deenam bedangem paadak langka.

⁴ Roje mimang opan legape ralbila, aréénem mosiila, delokke iréénem ikum daklangka.

⁵ Siirum siirum loope doonyike saadak tetengem, pooloke latdak tetengem bí duuyar langka.

⁶ Roja bí aríklo pedong onam kísape idaklangka, amosok aapam kísape idaklangka.

⁷ Bíkke turdung tetengem aro yéname siingon daklangka, delokke pooloke lolatdung tetengem, jénam-remname duudak langka.

⁸ Bí siyéng kéényung konlokke siyéng kéényung konlo, delokke Euphrates korong lokke ila tani among kéényung regolope yébom daklangka.

⁹ Mooruk amolok amie bíkke keralo kumsu daklangka; bíkke mirue agí agísue amolo olet sudaklangka.

¹⁰ Ispein lokke roja kídíe delokke bogralokke bím aman biyé; Arabia kelang Ethiopia ke roja kídíekom bíkkíng aman boma biyé.

¹¹ Roja takame bíkke keralo lebíng koníyé, angu opín takame bím kumyé.

¹² Bíkkíng kabbisuna opan kídíem delokke mepaknam mimang opan kídíem bí mosiidung.

¹³ Bí molamana kídíem ayadung delokke pííram sémona kídíem iguldung.

¹⁴ Bí bulum díínam-monam itung-siréé pekolokke mosiidung; buluke turnamde bíkkepe are kanarunge.

¹⁵ Roje duutelangka, bím Arab elok uunem bidaklangka; bíkke legape kumyar bidaklangka; bíkkíng agínpe Shédíke ayang igulem bidaklangka!

¹⁶ Amoso ali-ayém jémolangka; Lebanonlo jénam kísape dííte moopangem ali-ayé bíísét daklangka. Doolude aríklok tami kísape amie bíísét daklangka.

¹⁷ Bíkke amínem mitpan sumo mapeka, doonyi saadak tetengem bíkke amíne duuyarlangka! Angu opín takame bím ríngge daklangka, Shédí bí bulum lubéédope bulu idaklangka, delokke bulu rojem ashéng lupoem podak langka.

¹⁸ Israel lokke Shédí Ruutum bím rínggelangka. Bí petom irisinyo atíem idung.

¹⁹ Bíkke erkínam amínem koyit langka! Bíkke angun ralname among tabusim bíísét daklangka! Amen! Amen!

²⁰ Jesseke oo, Dabidke kumnam kídíe so iríkai.