MIRILUNGGU 71 - DEENA BAIBÉL (BSI)

Mijing Lokke Kumnamko

¹ Ruutum nokkímin ngo duusigepe aadune; ngom edílote ralnam em pííram momayika!

² No arolok duune, depeila ngom igulla mosingtoika. Ngom tatbila laasing toika!

³ Ngokke duupope duusi sukepe itoika, delokke ngok yapgo tamtepe itoika, no ngokke dungkenge delokke tamte.

⁴ Ngokke Shédíe atímana amilokke ngom mopítoika, arolok yémana delokke kaníína amilokke ngom laasing toika.

⁵ Kapeila Ruutum no ngokke míínam suname, Ruutum no ngokke yaamé siisang lokkekai míídasuname.

⁶ Ngokke yénam takamlo nokkíng ngo míídasuto; ngom odo lokkekai no ngom mosiito. Ngo agínpe nom rínggeyé.

⁷ Ngokke yénamsi ami kídí keepe kaayii sukepe ito, kapeila no ngokke tolnarung tamtepe ito.

⁸ Bomo loodípe ngo nom koyitdung, delokke nokke angun ralnamem pokandung.

⁹ Mijinge jingaduso ngom mepak mayika, ngo supak tolyimang emla ngom míípak mayika.

¹⁰ Ngokke mirue ngom petpe idung. Bulu ngom morupenam legangem lupo sudung.

¹¹ Bulu podung, “Shédí bí bím mepakto; bím mamín gela umlaju, delo bím iyangpena kamang.”

¹² E Shédía, ngokke lok mooteng mayika ngokke Shédía, ngom menape igultoika!

¹³ Ngom míílona kídíem petpaktoika, ngom ike-sirena kídíem annying motoika.

¹⁴ Ngo agínpe nokkíng míínamsuyé, ngo nom bojéyayang rínggeyé.

¹⁵ Ngo nokke ainam agérem pobiyé; deddíko kénpí madokom, nok mopít kunamem lolope pogeyé.

¹⁶ Shédí Ruutum nokke tolnam ralnamem ngo rínggeyé, ngo nokke ainam petomem pogoyé.

¹⁷ Ngokke koo lokkekai no ngom luyilto, delokke supakkom ngo nokke irisinyo agérem pogedung.

¹⁸ Supak ngo mijinge, delokke ngokke dumíd si dumpukai, E Shédía, ngom mepak mayika! Aapena siirum takamlo nokke deenam emlang tolnamem pokandung, ngokkíng duumínlangka.

¹⁹ Shédíe, nokke deenampe yéname taleng píngkai. No bottena atíem itung, delo nokke kísana kamang.

²⁰ No adír asong ankí kenuem ngokkíng melíkdung, idokom no ngom tolmoyéku, no ngom agolo duumomayé.

²¹ No ngokke amínem bottemoyé, delokke ngom ngiiyéku.

²² Ngo nom arope tapulok rínggeyé; E ngokke Shédía, nokke edíng namem ngo rínggeyé. Ngokke konggalok nom miriko lubiyé. E Israelke Deena Atela.

²³ Ngokke nom yidgenam miriem ludungem, ngokke nappange ashéngem goktoola luyé, ngokke aapí-aang tabusi miripe dung, kapeila no ngom mopítto.

²⁴ Delo ngo nokke aina igulem loodípe pogeyé, kapeila ngom míílo aabomna kídídem no ikumto, delokke annying sumoto.