MIRILUNGGU 64 - DEENA BAIBÉL (BSI)

Mosingdokupe Rogusunam Kumnamko

¹ Ngo adírdung E Shédía, ngokke kumnamem tatbika! Miru kídíem ngo pesodung, ngom mosing toyika!

² Atímana mirul kídíke ngom petpe emla, ruubo sukolokke ngom laasing toyika, marlína mibam lokke ngom mopítoyika.

³ Bulu agí ayuem yoksa ratna kísape ratmodung, delokke epuk ruunam kísape, kaníína agom pope emla ruubomdung.

⁴ Bulu annyingrunam atíem igotmape iyamdung, bulu aina amiem mide yao kísape ipusiléédung.

⁵ Bulu mipile buluke miru agérem erbom elendung! Bulu agotlo tobom pekuem kéndung. “Sékote bulum kaalamang,” bulu emsudung.

⁶ Bulu runam agérem idola posudung, “Ngolu iperunam agérko ito.” Tanike aapí-aang aradem kaapímang.

⁷ Idakkom Shédí bí bulukíng epuk aplíkla, bulum menang asak apké-apréyé.

⁸ Buluke dekepe agom lukolok bulum bí petpak yéku, bulum kaana takame dumpe rekep ilíkyé.

⁹ Delo ami takame pesue iyé; Shédíke marnam agérem bulu míítí geyéku, delokke bíkke inam-saanamem mantí geyéku.

¹⁰ Deenampe yéna takame Ruutumke inamem kaala rínggeyé. Bulu bíkkíng duupope duuyé; aina ami takame bím koyityé.