MIRILUNGGU 62 - DEENA BAIBÉL (BSI)

Shédíke Pegolo Míídíng Suname

¹ Shédíke itur kupenamem ngo asoope toyala dung; ngo bíkkíng petom míítesula dung.

² Bí petom ngom iturne, delokke mosine; bímin ngokke tamte, delokke ngom edílokom ikummayé.

³ Edítko etor bénsupena kísape ralmana amiem, nolu míílola aabomyéne.

⁴ Nolu bím edíípe mííbomnam amolokke laayikupe emla míídung; nolu menam lunamem lungampe míítídung. Nolu teyonglok lubéé em ludung, idola noluk aange bím béédung.

⁵ Ngo Shédí petom kíng mííte sudung, ngo bíkkíng míínam sudung.

⁶ Bí petommin ngom mopítne, bímin ngokke yapgue; ngom edílokom ikummayé.

⁷ Ngokke turpekode, delokke ngokke amín kakode, Shédíkelo dung. Bímin ngokke mííte sukeng edíína tamtede; bímin ngokke duusi sukode.

⁸ Bíkkíng míída suyarlangka ami kídía; bím noluke ankíem lukan sulangka. Shédí bí ngoluke duusi suko notkue.

⁹ Tani takamsi ngarum atel kísanako; bottedak amédak akampe are kamang. Bulum bekkí langka, bulu tebegmang; bulu ngarum atel asaremte essayadung.

¹⁰ Rotbín ibínnam agérem adumpe míísu mapeka. Rulnam inamlok paape dope míímapeka; mireme bojéyayang idokom, nokke aangem melík sumapeka.

¹¹ Lennyi lengumko Shédíke sikepe ponamem ngo tatto, ralnamde bíkke,

¹² delokke bíkke ayangde duuyarne. E Ruutume, no agíe mipilem mipilke agér adulok amanem bikune.