MIRILUNGGU 60 - DEENA BAIBÉL (BSI)

Mopít Dokupe Kumnamko

¹ E Shédía, no ngolum mepakto, delokke ikumto. No ngoluke teyolo marto; E ngolum supak tosing langkuka.

² No asi amongem engen moto; no sim barkémoto; supak sokke taríem ipí tolangku, kapeila si barpan sukai.

³ No nokke amikídíem séngéépe adírmoto; ngo tíngírsuna kísape gígoosuto.

⁴ Ajénglo omem sumadope, nom pesona kídíem no lunooto.

⁵ Nokke tolnamlok ngolum laasing toyika; ngoluke kumnamem tatbika, demílomin nokke ayanam ami kídíem mopíyéne.

⁶ Bíkke dungko lokke Shédí bí podung, “Ngokke ikumrongem Shekhem em ipan supala, Sukkoth yiibem ngokke ami kídíem biyé.

⁷ Gileadde ngokke, delokke Manasseh dekom ngokke; Ephraimde ngokke lubrue, delokke Judahde ngokke roja banggéne.

⁸ Idakla Moab dem ngokke laksuk sukeng ekungpe iyé, delokke ngo ngokke leyugem Edomlo, ngokke yébomname emla kaadope gelíkyé. Delo Philistia de ngom ikumla gokbatyé míídudí?”

⁹ E Shédía, yapgo monam doolung delo séko ngom gíaboyén? Edomlo séko ngom gíboyén?

¹⁰ No ngolum arope lupak sutonía? No ngoluke sipayingem gíbo mayénía?

¹¹ Ngolum ayala maklínglo igultoika, tani igulde atí are kamang.

¹² Shédíke igullok ngolu ikumyé; bí ngoluke miruem ikumboyé.