MIRILUNGGU 55 - DEENA BAIBÉL (BSI)

Míírí-míínyo Bomnam Ami lokke Kumnamko

¹ E Shédía, ngokke kumnamem tatbika, ngokke kumnamem tatmape imayika!

² Tatgap podola ngom poyan subika; ngokke míídír sukolok, ngo bengalkai;

³ Ngokke mirue ngom irítla ngom pesomodung, loorímana ami kídíke míílo kolok ngom bengal motung. Bulu ngom idír isong bomdung. Bulu marla ngom kangkidung.

⁴ Ngokke aapísí pesue idung, gérma-paamo pename ngokkíng píídung.

⁵ Peso yiríname ngokke teyolo píídung, pesuem ngo amíd sanggedung.

⁶ Delo ngo podung, “E ngo pekí kísape alap getuamílo! ngo yopnyokla asoope duusi geyai.

⁷ Ngo mootelo yopgoola kénmangko amolo duusi sugeyai,

⁸ ngo pesonam gumnam lomnam lokke agísue menape duusi sugeyai.”

⁹ E Ruutume, buluke mííbom namem nyokmola, buluke agomem agér kamomayika, kapeila ngo momín lumín agérem doolulo kaapadung.

¹⁰ Longe yohpe bulu taon beyulo gígoola, pyoonam-inam mílípe ibomdung.

¹¹ Petnam monam mílípe delo kadung; bedu bedade itu-siréénam mílí idung.

¹² Ngom lungilnasi miru kuamílo ngo dem donggeyai; ngom míílumna si ngokke mibo kuamílo, ngo bím runyok geyai.

¹³ Idakkom ngokke repesinying, yébo-dakbo sunam angong kídí nolumin sikepe idune.

¹⁴ Ngolu aina lupoem pobosutuai; Shédíke ekumlo ngolu gyabbo sudungai.

¹⁵ Siname bulum aabom daklangka; bulu turdola tani amongke siko nyokkolo yédak langka. bulu yirípedínam agolo gídaklangka.

¹⁶ Idakkom ngo Shédíme gokdung; delo bí ngom ituryé.

¹⁷ Yume-roh, delokke kaadu suduem, ngokke adírem, delokke kapnamem lukansudung. Bí ngokke agomem tatyé.

¹⁸ Ngokke mimak imínsunam deddína maglíng lokke ngom bí ekerdope bomyéku.

¹⁹ Batlen delokke yébona Shédí bí ngom tatbiyé, delokke bulum ikumyé; kapeila bulu míílat sutokupe imang, delokke Shédíme pesomang.

²⁰ Ngokke kerang angonge, agíke angong kídíem mirupe idung; bí agí agomem kutsu dungku.

²¹ Bíkke agomde makonemte remak yatuai, idakkom mimak aapíde bím duulup bomdung; bíkke agomde télemte belap yatuai, idola dekede mirupe duusu kaku.

²² Nokke egedem Ruutum bíkkíng melíktola; delo bí nom gakbomyé. Bí agínpe deenampe yéna amiem ikumla yémoyé.

²³ Idakkom E Shédía, no petna-mona, mena-yadna bulum, buluke turdung adape, buluke agolo leelíkyé. Ngokke pedan, ngo nom míídasuyé.