MIRILUNGGU 52 - DEENA BAIBÉL (BSI)

Shédíke Bisarelang Yanggonge

¹ Adum-ale ina ami no kapeila botterupe míísudune. Shédíke míngkede duuyarne.

² Lolope amiem nyokmope emla no ruutídung, nokke ayode dumíd yoksik kísa ratname idung, no moru-iru mílílo itídung.

³ No ainem pakyape atímanem míídung, delokke aro agom empemílo menamem bojéyape podung.

⁴ No metí-yattíne, no amiem gomké lunam mílílo míítídung.

⁵ Shédí bí nom nyokyar moyéku; bí nom gakla ekum lokke solenyéku, bí nom tani gíída sokke laapak yéku.

⁶ Deenampe yéna kídíe dem kaala pesoyé; delokrongem ngilka dola sikepe emyé,

⁷ “Kaatola agí turpenam legape Shédíkíng míída sumana amisim, dem megeyéla agíke kanam remnamlo, delokke agíke ekum eralo míídíísuna sim.”

⁸ Idakkom ngodan Shédíke ekumlo olib esing siisana kísa Shédíke ooyimana ayalo agínpe míídasula dung.

⁹ Nokke sikepe inamem kaala ngodan agínpe nom yidgeyé. Ngo nokke amínem pogeyé, kapeila si Shédíke ami kídí keralo ainako.