MIRILUNGGU 44 - DEENA BAIBÉL (BSI)

Mosiidope Kumnamko

¹ E Shédíe, ngoluke nyorulok ngolu tatsuto, konnying mennying kake yédudelo nokke inamem ngoluke abu kídíe ngolum pobito.

² No agíe shédí kamana ami kídíem monpak pala, delokke buluke amonglo nokke ami kídíem duumoto. No moomem angu opín kídíem ingéépala, nokke amikídíem gerep moto.

³ Nokke amikídíe amodem yoksalok ikummang; bulu agí ralnamlok ikummang; de nokke pauar loklang tolnam lokmin, nokke ayala dunggul kolokmin ikumde ikane.

⁴ Nokke ami kídíem ikumnamem bina ngokke Rojelang ngokke Shédíe;

⁵ delokke nokke ralnamlok ngolu miruem ikumdung.

⁶ Ngo ngokke iyyi epuklo mííte sumang, delokke ngok yoksekom ngom mopítyé emla míídasumang;

⁷ idola no ngolum ngoluke miru lokke itumto, delokke ngolum kangkina kídíem ikumto.

⁸ Ngolu agínpe nokkíng bottepe míísudung, ngolu nokke amínem koyit ayaryé.

⁹ Idakkom supak no ngolum mepaksula, ngolum rumkílo doomoto, delokke no maklíngem gíbola gíyimang.

¹⁰ No ngolum miruem dugge dokupe ito, delo buluke míínampe ngolum líkutto.

¹¹ No papenam mér kísape ngolum imoto; no ngolum mibo amolo dunggomoto.

¹² No nokke ami kídíem atírung are kamana kísape konyokto, delokke arede nokke sérangem goobyak momato.

¹³ Ngoluke kumríe nokke ngolum inamem kaato, delo bulu ngolum lukaala ngilkato.

¹⁴ No ngolum ami kídíke luman mankepe ito.

¹⁵ Loodíke ngo ipusilééko gooralo dung, ngo annyinge bíísétdung.

¹⁶ Ngok mirulokke lupu-luyé agom emla ngom kangkina lokke ngilkangem ngo tatla annyingdung.

¹⁷ Si takam si ngolukíng aato, idakkom nom ngolu mitpan sumang.

¹⁸ Ngolu nokkíng míídasumape imang, nokke ngiitomem tatmape imangai.

¹⁹ Dekepe ilate no ngolum sipyang gooralo melíkto; no ngolum kaamo ruruk amolo melíkto.

²⁰ Ngolu ngoluke Shédíme mitpansula, delokke angukon shédíko kumsu dumílo,

²¹ no berokrupe dem kényai, kapeila no ngoluke arang aapíem kéndung.

²² Idakkom nokke legape ngolum loodíke petyardung, delokke palík penam mér kísape sanbomdung.

²³ Ruutume darngo sutola! Kapeila no ipnge sudune? Gereptola! Ngolum mepak ayar mayika!

²⁴ No kapeila ngolum rusi gekane? Kapeila ngoluke adír asong ankí-kenuem mitpan sukane?

²⁵ Ngo among kédépe idakkai; ngoluke amíle amolo doola demulpe idakkubong.

²⁶ Gereptola, ngolum igulkape nokke duuyarna ayang binam akorlok ngolum mopít toika.