MIRILUNGGU 42 - DEENA BAIBÉL (BSI)KITAB ANNYINANE Leenyoknam Amilokke Kumnamko ( Miri 42—72 ) 1 Sidume ansiina soyit asiem matínam akampe E Shédía, ngokke ainange nom matadung. 2 Turyarna Shédíme ngokke aange eruk-erage ibomdung, edílo ngo gíla nokke keralo kumsupene? 3 Longe yohpe ngo kapdung, delokke miksi petomde ngokke dotkéye; loodí mipíem ngokke mirue ngom ííyardung, “Ingkoloda nokke Shédíe?” 4 Shédíke ekumlo mibamem yonbosula ngokke gíbo sunamem, mibam kídílokke ashéngla miri lula, Shédíme bottepe ríngge namem, ngokke míípa suyékuem ngo aang oname idung. 5 Ngo kapeilai buulínge idune, kapeilai deddípe ngo adírdune? Ngo Shédíkíng míínam suyéku, lekoda ngo bím rínggeyéku, ngokke mopítna Ruutum me, delokke ngokke Shédíme. 6 Delok legape ngo míípang sudungku. Mijar díítelo, Hermon díítelo, Jordan amolo pesorunam dínggo olíknam kísape, 7 leenyokko amoso ngokke ainasi beddung. Bí sipyar kísape ngokke ankí-kenuem imoto; puumu gíduem inam kísape, ngo adírem akén-ayén geyimang. 8 Ruutum bí bíkke duuyarna ayangem longelo lengkan daklangka, demílomin yumelo miri lula turmona Shédíkíng ngokke kumname kayéne. 9 Ngokke tamte, Shédíkíng ngo luto, “No ngom kapeila mepak sukan? Kapeila miru kídíke iréékolo ngom melíkdune?” 10 Ngokke miru kídíke, “Nokke Shédíbí ingkolo?” emla íídan tetela lupu-lulénamlok ngokke aange bottena taríkolok kigenam kísape kidung. 11 Ngo kapeila siddípe ankí-kenodune? Ngo kapeila siddípe adírdune? Ngo Shédíkíng míínam suyéku, ngom turmona, delokke ngokke Shédíme, lekoda ngo rínggeyéku. |
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
Bible Society of India