MIRILUNGGU 40 - DEENA BAIBÉL (BSI)

Rínggenam Miriko

¹ Ngo Ruutumke igulem jémgapla dooyato; delo bí geenínla ngokke kapgunamem tatto.

² Bí ngom pesonam kobung lokke yullumna sulli lokke gakreptoku. Bí ngom lííreng edíngkolo mesiito.

³ Bí ngom miri aníko ludope, ngoluke Shédíme rínggenana miriko bito. Amie deddíko kaala, pesola, bulu Ruutum kelo míídasuyé.

⁴ Ruutum bím míída sunade gérne, mimanglo gígu kumana, delokke shédí aromangem kumsuna kídílo yémín gemana kídíde gérne.

⁵ E Ruutum, ngoluke Shédíe, no ngoluke legape deddína atíem ibito, no ngolukepe deddíko irisinyuem ibito, nokkíng luyii supenam kamang. Ngo bulum atí sankén yimang, buluke sandume bojérungko idung!

⁶ Iyyi kungkatnam ipagem no míímang. Rombuunam ipagemlang paab ipagem no míímang. Igeyéla no ngom nokke agomem tatnana nyorung komin bitone.

⁷ Delo ngo poto, “Sina ngo; nokke ngom luyil agomem ayon kitab si attung.

⁸ E ngokke Shédía, ngo nokke ngiitomem igelídung; nokke luyile ngokke aangsi dung.”

⁹ Ami takamke duusumlo, E Ruutum nokke ngolum laasing kunam legangem ngo poboto. No kénsudung, ngo edílokom dem pogemape imayé.

¹⁰ Nokke iturkunam agérem ngo aapí araso gebum sumang. Ngo nokke míngkeng emla igulem poge ayardung, nokke ngolum míída sunam, delokke duuyarna ayang legangem baane duusumlo pomape asoope duunyokmang.

¹¹ Ruutum, nokke ngom yaasam namem melumang, dem ngo kénsudung. Nokke ayangelang aroe agínpe ngom turmodung.

Iguldope Kabbi Sunamko

¹² Ngom sanam yimanam adír asonge bíísét bomdung! Ngom paabe umto, delokrongem atí kaapa yimang; de takamde ngokke dumíd emte bojéyadung, depeila ngo bomram alongkai.

¹³ E Ruutum, ngom mosiitoika, ngom igultoika! E Ruutum, ngom menape igultoika!

¹⁴ Ngom mokapena kídíem monpansula ikumtoika. Ngokke adír teyolo ashéngna kídíem langa langkula annying motoika.

¹⁵ Ngom ngilpu-ngilléna kídíem ikumla, míngíí sumo tokuika.

¹⁶ Idakkom nom matala aana takamde erla nokkíng ashéng daklangka; Nokke iturkunam agérem yidgena kídíde agínpe luyé, “Ruutum bí edítko botterune!”

¹⁷ Ngokke pedan ngo opanko, aréénako; idakkom Ruutum bí ngom míngkí bidung. No ngokke mopítna Ruutume, delokke Shédíe, ngom igulkape menape aatoika!